Da ka tulop wa chi bnai chiteiñ e yarap pynmiat u Conrad ya ka skur hapoh Nongstoin Constituency

Shillong: U montri rangbah ka jylla, u Conrad K. Sangma ynne da lai pait u ya ka Shohphria Government Lower Primary School, kawa em hajan Nongstoin, West Khasi Hills, ya kawa da chna pynmiat lyngba i e yarap na ka tulop u kawa chi bnai chiteiñ kawa kynjoh T. 3.14 lak.

Kani ka skur toh kawa sdang ha u snem 1956 da ka Balang Presbyterian wei da chimkti ya ka da ka sorkar jylla hadien wa pynkha ya ka Meghalaya, na ka Assam wei kani ka skur da man ko kawa chah iehbeiñ la kamwa arphaw snem heiwa ki chram da kaad ki, ki saad leh da jæd wa kiwi kiwi.

Ha uni u bnai wa dadep u Conrad da pynbna u wa daw e yarap u lyngba ka tulop yong oo wow chna pynmiat ya kani ka skur wei da pynsñiaw u leh yei mynsien wa kmen hawa sakhi ya ka ynne ka sngi deiwa kular wow yarap chooh ya ki skur neini chakhmat hapoh ka jylla.

“Man ko ka kaam wa khian neibhah wa ka thong yong ka sorkar toh yei stat i tip neibhah wa man i iwa khroo ya ka mynried ki khynnah wa ka jylla, deiwa kwah O u pynchlur ya kiwi kiwa mihkhmat, ki sahep sorkar, ki bru ha ka khayi pateiñ wa kiwi kiwi wow e ki katwa joh i bor neibynta ki khynnah wa ka mynried yong ki,” da ong u Conrad.

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Da ong u leh wa neidaw wa duna poisa man i u moochynthut wow yarap poisa ya ki thaw puræ tangwa han la kattæ ka sorkar yaleh ko katwa ye wow pyndap pynbiang yeini.

“Lada bahkhlieh i wow yarap katwa joh i bor yong i ya ki khynnah ka jylla, tæ daw yarap ko ya ki chiboon,” da pynrap u.

Da kyntu u ya u MLA ka Nongstoin Constituency u Macmillian Byrsat wow kam (adopt) ya kawi ka skur hapoh South Tura Constituency, kawa oo (Conrad) man u kam uwa mihkhmat ko deiwa kyntu leh ya kiwi wow bood ki yei jooh hi.

Ha kani ka sngi da yaklam u leh wa ki khynnah skur wei da pyndur u leh wow man kam uwa sikai heiwa da hikai u ya ki wow tipmit ya ki mrad wa ki dak thoh.

Neiliang ki khynnah da e khublei ki ya oo wei da kam ki wa ka skur ki da miat ko wei da ye ki wow chong class heipor lyiur leh. Da chna pynmiat ya ki san tylli ki kamra class, ka staff room, ki chuki ki miej wa kiwi kiwi kam ki slait.