Shillong: Hadien wa rai ka sorkar jylla wow pynmih chooh ki C&RD Block Office wa kynthup ya ka Mawlai C&RD Block. Da mih chiboon ki yaklam na kiwa boon ki liang khamtam na ki seiñbhalang kiwa em ha Mawlai kamjooh na ka Mawlai Town Durbar leh.
Heiyatoh wa ini, U MLA ka Mawlai Constituency da khut yalang u ha Mawlai hi ha yung yong oo ynnin ka 17 tarik heipor 9 waje i step heiwa da wan poi lang kiwa kitkaam ka Mawlai Town Durbar, ki Rangbah Shnong kiwa na Mawlai, ka Seiñ Samla Mawlai Pyllun wa kiwa mihkhmat na ki seiñbhalang kam ka HYC ka FKJGP wa kiwa chong chnong ka Mawlai.
Ka yalang da pyllai da u Larry P. Warjri, da yoh leh yei pynche yei lai luti u MLA ka Mawlai nadooh wa da rai wow em noh ka Mawlai C&RD Block Office wei da booh leh ka thong wow yachem wa u Montri Rangbah u Dr. Mukul Sangma ha kani ka tayaw hei emlang kiwa kitkaam ka Mawlai Town Durbar, Rangbah Shnong Mawtawar, kiwi de ki Rangbah Shnong ka Mawlai, ka Seng Samla Mawlai Pyllun, ka HYC wa ka FKJGP Mawlai Circle wa kiwi kiwi. U Embhahlang Syiemlieh, MLA da pynche u wa dadep yachem u leh wa kiwi de ki MLA ki Constituency ki wow haap hapoh ka Mawlai C&RD Block wei da yachem u leh ya u Sniawbhalang Dhar u Montri Sorkar wa pait ya ka Community & Rural Development.
Haka yachem wa u Montri Rangbah ka jylla, da sñiawthooh wa neiliang ka sur ki paidbah Mawlai da bait ki wow e mynkna ya ka thaw wa em ha Mawlai Mawtawar kawa da dep e chwa cha ka Office U Director C&RD, Meghalaya.
Kamtæ hadien ka yatai nia da pynbna u Secretary ka Mawlai Durbar Town Durbar, ki Rangbah wa kitkaam na Mawlai Mawiongrim, Mawlai Mawiong Umjapung, Mawlai Nongpdeng, Mawlai Nongkwar, Mawlai Mawtawar, Seng Samla Mawlai Pyllun wa kiwi kiwi de wa ka yalang da ka wi ka sur da rai ha ka sngi wow yachem wa u Montri Rangbah u Dr. Mukul Sangma, daw e leh ka chithi katkam ka rai ha kani ka yalang ka wow soi pytuid lang wa u MLA ka Mawlai, Mawlai Town Durbar wa u Rangbah Shnong Mawlai Mawtawar wa toh wow wai noh ya ka thaw wa e da ka chnong Mawlai Mawtawar.
Discussion about this post