Kam chibynta ka World Physiotherapy Day, neiliang ka chnat Physiotherapy yong ka North East Adventist University (NEAU), Khliehtyrshi chirup i yakrehlang wa ka Meghalaya Branch Physiotherapy Welfare Association, ha ka 8 tarik da hiar ki cha Ummulong CHC, West Jaiñtia Hills District wow e sumaar mynkna wei pynsñiawthooh paidbah heiyatoh wa i kjut Stroke, kjut klongsnaam, i ku BP, i kjut chini, i ku khleiñ wa kiwi de deiwa pynman da ka Drama wa chimbynta ki khynnah ka NEAU kamjooh leh i klam pynche na ki Doctor heiyatoh wa kini ki kjut.
Ha ka yalang pynche paidbah da emlang nadooh u Medical Officer In-charge ka Ummulong CHC, u Dr. Pura Pakma, neitæ ka Dr. Junita Kyndait, Head of Physiotherapy Department, North East Adventist University, u Dr. Hamboy Langbang napoh Meghalaya Branch Physiotherapy Welfare Association wa kiwi.
Ha kani ka sngi ka Dr. Junita da pynche ko yei emkaam i sumaar Physiotherapy ya kiwa yoh Stroke hadien wa biang lai ki snaam ha i doh i pran khnang yow ye biang ki u im kamwa jooh neibynta u pyntoh pynbiang ya ki hi, yow lait kiwa ha-yung u saja e baam, u yah paitkhana, u pynsum pynsait wa kiwi. Kamjooh leh kammon ka Physiotherapy yarap ko u yada yow lait u yoh ya kini ki kjut.
Kyntu ko leh wa hawa em ki dak ki chin kam i dor durkhmat, i tlot ki kti ki kjat, i saja u klam hap yah lai thooh dawai wut-wut yow yoh yarap ki heipor wa biang.
U Dr. Pura Pakma hawa klam da ban joor u hajrong i emkaam i yada yow lait nei yoh Stroke, i kjut klongsnaam wa kiwi, deiwa kyntu wow im deiwa miat wa bha nadooh i baam i dih wa man-ka-sngi.
Da pynkynmoo haroh u wa i myllien wow dih kiad, dih sikret, baam kwai, baam duma, i baam ya ki jait baam wa dadep pynchna pynkhleh kut jait man iwa maa yei chait i khiah wei iwa ye u yah cha kini ki jait kjut.
Neitæ da kdaw haroh u yei kjut Cancer wa yoh bha ki bru ha kani ka jylla wei i daw toh na kini hi ki jait baam jait dih wa myllien ki bru yong i hi.
Hawa pynrap yei emkaam im deiwa bha wa miat, kyntu haroh u wa kitu wa em BP, em chini wa toh u syndong bha wei wan phah Check man-i-por yow lait u poi cha u pood yoh Stroke wa Kidney Failure.
Kamwa ka phang yong kani ka sngi toh Cardiovascular Disease and Stroke, neiliang ka Dr. Junita Kyndait kamjooh napoh Meghalaya Branch Physiotherapy Welfare Association, da e ki i batai bniah hajrong kani ka phang.
Ha kani ka sngi neiliang kiwa puræ ha ka chnat Physiotherapy ka North East Adventist University, Khliehtyrshi da lai pynsñiawthooh haroh ki ha Iawpynsiñ Wahiajer hajrong kani ka kjut da i lehke drama wa i sikai leh Exercise kammon u sumaar u yada na kini ki kjut.
Discussion about this post