Shillong: Ka yakhih pyrchah ya ka Citizenship Amendment Bill, ha ka jylla Meghalaya da joor bha ko ynne ka sngi neibhah hadien ka khang chnong wa khut da ka North East Students’ Organisation (NESO) ki paidbah da mih ki cha sarok deiwa lai kjat nadooh Madan Iewrynghep chadooh Motphran deilang waka sur wa sawa wow dawa ya ka Inner Line Permit.
Ha Motphran ka yalang da pynlai da ka Confederation of Meghalaya Social Organisation (CoMSO) heiwa da wan chimbynta leh da ki hajar ki paidbah wow pyrchah joor yaka CAB, wei wow beiñ leh yeileh ka sorkar India kawa da mynjur ya ka CAB ha ka dorbar Lok Sabha.
Ki paidbah da pynsñiaw ki leh yei chrai yaka MP yong ka NPP na Tura, ka Agatha Sangma kawa da e yei kyrchaan ya kani ka Bill kawa man pyrchah yei sñiaw ki paidbah ka jylla wa ka thaaiñ waroh kawi. Ha i lai paidbah da emlang leh ka MLA yong ka Congress na East Shillong, ka Dr. M. Ampareen Lyngdoh wa u MDC ka Rambrai, u Bajop Pyngrope nalor ki bru rangbah wa ki khynroo khyllood.
Ka CoMSO ynne ka sngi da pynman ko ya i thang dur bula yong u Modi, Shah, Agatha wa u Lat ha kylleiñ ka jylla, wei da sakhi ya ini kam ha Williamnagar hakhmat ka yungkrehkaam ka NPP, ha Nongstoin, Nongpoh, Khliehriat, Jowai, Tura wa Shillong.
Ha nongbah Shillong ki paidbah da ki hajar ngut da mih ki wow chimbynta hei thang ya ki dur bula u montri rangbahdooh yong ka ri India u Narendra Modi, u myntri kaam poh yung u Amit Shah, ya u Lat yong ka jylla u Tathagata Roy wa ya ka MP na Tura ka Agatha K Sangma ka yong ka NPP kawa da kyrchaan ya ka CAB.
Chwa wow thang ya ki dur bula da yoh leh ye klam na ki seiñ waphær waphær kiwa da pynsñiaw yei sñiawsih wow yoo wa ka Party NPP kawa yahkhmat yaka sorkar ha ka jylla da e ko yei kyrchaan ya ka CAB lyngba ka MP, ka Agatha K Sangma.
Da pyntip leh wa ha ka 30 tarik u bnai wa dep, ha Delhi, ki dang ya soi ya ka dorkhat wow e cha u montri kaam pohyung yow pyrchah ya ka CAB, tangwa pluk da chah dung nadien hawa ka Agatha da e ko yei kyrchaan yaka CAB.
Ha kani ka yalang kawa da pynjoor bha i sonteri ki pulit da sawa haw i dawa ILP, wei kbai beiñ leh ya ka BJP, wa ki MLA ka Party wei kamjooh ya ka NPP.
Discussion about this post