Ka Ialong Sport Club ynne ka sngi da pdiang sñiawbha ko ya ki Jersey wa da e sñiawbha da ki ar ngut ki chi lok kitæ toh u Benjamin wa u Firstborn (Sponsored by Ben & First) wei ya kini ki Jersey daw pynemkaam da ka Ialong Sport Club kam chibynta wow pynkhreh ya ka Super Division Tournament 2026-27 wa daw pynlai da ka Thadlaskein Sports Association.
Ha kani ka yalang wa tbian da pynlai da u President ka Ialong Sport Club, u T. Ram Phawa uwa man leh u waheh chnong ka Dorbar Chnong Ialong uwa da khana wa ya ka Ialong Sport Club da seiñ ya ka ha ka 22 tarik u October 2025 ha yung krehkaam yong ka dorbar chnong kawa em ha Moomulang/Moobynna Centre Point Ialong.
Da ong u wa i thmu yong ka Ialong Sport Club toh wow pynyatylli ya ki khynroo khyllood khamtam ya ki para wa yalehke ka chnong kamjooh wow wanrah yei sñiaw para-i.
I thmu wa ar yong ka Ialong Sport Club toh u man ki khon ka chnong kiwa ye u rah burom ya ka Ialong kamjooh yow lai bait lai ryntih i thmu yong ka Ialong Sport Club.
Hapoh ka chnong Ialong da em kamwa ynru tylli ki Sport Club kiwa psiah hapoh ka WJDSA, katwa ya ka Ialong Sport Club da pynpsiah cha ka TSA, wei kiwa yalehke ka Ialong Sport Club da soi na kitai hi ki ynru tylli ki Club wa em ha ka chnong. Wei ini pynyoo ko wa ka Ialong Sport Club kduplang ko ya waroh ki ynru tylli ki Club kiwa em hapoh yong ka.
Ka Ialong Sport Club hadien wa dadep seiñ ya ka da chimbynta ko ha ki kattu katni tylli ki Knockout Tourtnament heiwa da yoh ko leh u rah ya le tylli ki Trophy naam jop.
Neiliang u waheh chnong da pyntip u leh wa ha uni hi u snem daw pdiang leh ya ka madan Artificial Turf wa thymme heiwa i kreh dang lai i chaaid chaaid deiwa yarap u Minister ka chnat Sports & Youth Affairs, u Wailadmiki Shylla ka wow pynemkaam da ki 6 tylli ki Club wa em ha Ialong yow nang pynkhlan wei pynyatylli ya ki khynroo khyllood ha ki kaam Sport.
U Secretary ka Ialong Sport Club, u Masan War uwa man leh u Secretary ka Dorbar Chnong Ialong heijooh i por u wow man leh u Head Coach ka Ialong Sport Club neibynta u snem 2026-27, da kyntu u ya kiwa yalehke wow man kiwa ryntih kiwa tip wow pynemkaam yei por ym du ha madan yalehke tangwa wot ha ki kaam ki jaam yong ki wei wow tip leh u burom kylliang.
Da yooluti u wow man ki kitæ kiwa yalehke ka Ialong Sport Club kiwa dohyap hei chah sikai wei wow wan tista cha ka thaw sikai khnang yow man ka Team kawa jop, neibhah ka ktien phareng jooh ong ko “NO PAIN NO GAIN”.
Chwa wow pynwai ya ka yalang da yoh yei klam neiliang yong u Benjamin uwa man kam uwa pynlut wow pynyoh ya ki Jersey, wei da ong u wa i e sñiawbha ya kini ki Jersey cha ka Ialong Sport Club man ko kam chibynta i ya ksohktilang wa ka Ialong Sport Club ym du ha ki kaam poisa poilaiñ tangwa wow kyrchaan leh hei bor maya kamjooh hei bor pyrkhat, wei da kitbok kitrwiang u ya ka Ialong Sport Club yow man ko kawa poi cha ka thong khamtam yow man ko kawa jop ha waroh ki liang.
Discussion about this post