U Symbood Montri Rangbah ka jylla uwa man leh u Chairman ka Regional Committee wa pynbait pood, u Sniawbhalang Dhar da khana u wa ka Regional Committee da yaklam sani bha ki yei kyntoor pood yong ka Karbi Anglong Autonomous Council (KAAC) ha Khanduli, wei neiliang ki bor District ka West Jaiñtia Hills da kyntu ki ya ki bor ka Assam wow sangeh yei thmu wow pynsih ya u sarok ha katai ka chnong.
“Neidaw wa katai ka thaw toh kawa em hapyrdi i ya pynbait, da phah i ya ki bor District wow phah sangeh chisiendon yei wan toor ka KAAC kat hadooh wa ki ar sorkar u chong ya pynbait ki,” da ong u.
Da ong u leh wa kam ini i jia da jooh mih i man-i-por, tangwa neidaw wa dang haap hei pynbait toh u ieh chwa kamwa da man katni.
Chooh chooh da ong u wa em ki thaw wa ki ar jylla hap ki wow e laad wow pynkreh ya ki kaam pynroi, deiwa pyntip chwa cha ki bor District ka Meghalaya.
“Kopsar itai iwa leh ki toh khlem da pyntip cha ki bor District. I da ong ya ki wow sangeh chwa kattæ wei wow ya krehlang,” da ong u Sniawbhalang.
Ki bor ka Karbi Anglong Autonomous Council (KAAC) ryngkat ki pooh chiloom ka 16 tarik uni u bnai da lai toor ki cha ka chnong Khanduli, West Jaiñtia Hills District dei thmu wow tih wei pynsih noh ya u sarok wa da chna da ka sorkar Meghalaya.
Katkam ka Video wa da poor ha ki Social Media, da yoo ya 2 tylli ki pooh chiloom kiwa da toor cha ka chnong Khanduli wow tih wow khloh ya u sarok wa pynyabi cha Hamren, West Karbi Anglong. Da pyntip leh ha katai ka sngi da synraan leh da ki pulit Assam wa ki bru paidbah na Assam.
Hawa thooh bniah ya itai i Video, da khana wa da jia heipor kamwa soo duna i janmiet, heiwa neiliang kiwa yahkhmat chnong ka Khanduli da lai ki wow tuklar wei wow phah pynsangeh noh chwa yei thmu ka sorkar Assam.
Discussion about this post