Ki paidbah wa chong chnong ka Lapangap da rai ki wow liwan noh cha chnong wei wow sdang biang yei kaam rep nadooh mynstep ka sngi hadien wa da yoh ki yei kular wow yada na ka sorkar.
Ini i rai yong ki paidbah da mih ko hadien ka yalang wa da khut ya kiwa yahkhmat ki seiñbhalang da u Symbood Montri Rangbah, u Sniawbhalang Dhar deiwa ya emlang ki heh sorkar nadooh u Chief Secretary, u Dr. Shakil Ahmed, u Deputy Commissioner ka West Jaiñtia, u Abhinav Kumar Singh wa u Superintendent of Police ka West Jaiñtia Hills, u Jagpal Singh Dhanoa.
Hadien ka yalang, neiliang u SP wa u DC ka District da lai ki wow pyntip yei rai cha ki hajar ngut ki paidbah kiwa da yang ha khyrdop ka Secretariat, heiwa da pyntip wa ka sorkar da rai ko wow phah sonteri da ki SF-10 yow yada ya kiwa rep ka chnong nei chah pyndik ha ki Karbi, najrong wa i yaklam yong ka Peace Committee daw pteiñ i hapyrdi ki bor District na Meghalaya wa Assam yow wanrah yei chong suk chong saaiñ ha ka thaaiñ.
Neiliang ki paidbah da pynsñiaw ki yei hun hajrong ini i rai wa da chim da ka sorkar wei da kohngooh ki wow lai liwan cha ka chnong, tangwa da maham leh heijooh i por wa lada i kular ka sorkar ym pynkrehkaam ko, daw wan toor biang cha Secretariat deiwa wanrah chiboon chah ki paidbah na kiwa wan ynne ka sngi.
Discussion about this post