U MLA ka NPP na Nartiang Constituency, u Sniawbhalang Dhar ynnin ka 31 tarik da pynman u ya ka yalang yalap Election ha chnong Pdeiniadaw wei da man ko kawa chongchit heiwa da em da ki spah ngut kiwa chong chnong ka Pdeiniadaw da wan ki wow pynyoo yei mynsien wow kyrchaan pura ya u Sniawbhalang Dhar.
Ha kani ka yalang da em leh ki waheh yong ka chnong deilang u CEM ka JHADC, u Thombor Shiwat wa u MDC ka Moodymmai, u Jesse Suiam.
U Jesse hawa e yei klam da ong u wa u Sniawbhalang da man u u bru wa biang uwa ap ya iwon iwon iwa emkaam ka chnong ka thaw, ka imlang sahlang wot ka Balang tangwa kattæ leh ha ka Election wa dep da mih boon ki klam pyrchah ya u Sniawbhalang Dhar kiwa da sñiaw salia wow ap deiwa ong wa uwon uwon uwa mihkhmat ym jooh leh sih u ya kawon kawon ka Constiuency wei da leh ki katwa ye; wa ha ka Election wow wan yow ye u pdiang ya oo wei kiwa klam pyrchah toh du kiwa pynbiej donhi.
Kamtæ da kyntu u ya ka chnong Pdeiniadaw wow man ko kawa ya tylli yow ye u ya krehlang neibynta i bha i miat ka imlang sahlang wei ym toh wow chah pynbiej ha ki bru ki wym yatoh wa ki kaam synchaar khadar.
Neiliang won u CEM da ong u wa ym jooh dam u wow wan klam dorbar ha kani ka chnong wei da tip leh ya ka chnong Pdeiniadaw kam kawa yatylli nadooh nachwa wei da wan biang u ha kani ka chnong yow paan yei kyrchaan ya uwa mihkhmat wa pait ya ka luti ka syngkieñ, ka umbaam umdih, ki Hospital wa kiwi kiwa boon wa emkaam ym toh du neibynta ki para wa ngait neibhah ki mihkhmat ki neibynta waroh ki jait niam ha ka synchaar khadar.
U Sniawbhalang won da ong u wa ym toh u ang ya ka chi spah ar spah neibhah waroh du kiwa ye u e ha kini ki por neidaw wa waroh kwah yei jop wei ha kani ka kynti da wan smat u cha kani ka chong wei ym kwah u wow ieh ka wei kiwa wan bood oo ha kani ka sngi toh khlem da pynkhreh kari kiwa da wan dei mon yong ki hi.
Da ong u leh wa kat chawa lai ka Party NPP, ki bru da man ki deiwa boon heiwa ha Ri-loom Garo da tam lak ngut kiwa mih, ha Shillong du kiwa krehkaam da wan 45,000 ngut ki bru wei ini toh i sabut wa ka NPP toh kawa daw yoh boon dooh ki MLA namo ka Single Majority kamtæ ym toh u lai bakla cha kiwi ki Party ya man phi kam kiwa rem hajrong wa jop.
Da ong chooh chooh u wa ka Congress katni man ko kam ka kari wym em Tyre de kawa sah sa du ki Rim donhi kawa da em ha ICU kawa ym tip de mynnu u yap ko.
“Na Garo daw jop ka NPP 14-15 chaneiñ, na Khasi wa Jaiñtia daw jop 18-19 yow yoh ya ka sorkar wa skem yow ye u wanrah ya ka roi ka paar,” da ong u Sniawbhalang deiwa kyntu ya ka chnong Pdeiniadaw wow kylla thaih kylla dem yow pynkylla ya ka chnong yow man ko kam ka Model Village ha kani ka Election.
