U Montri sorkar ka jylla, u Dasakhiatbha Lamare uwa man leh u MLA ka Mawhati Constituency, da pynsñiaw u yei kmen wa ka sorkar da dep mynjur ko ya ka mang poisa kawa dapoi T. 114 klur yow chna ya u sarok Umsning-Jagi Road.
U Dasakhiat da ong u wa mar ya rang u slap, ka Company daw sdang noh ko wow chna ya u surok Umsning-Jagi Road uwa jrong 40 Km wei i lut i sep dapoi T. 114 klur wa da kyrchaan poisa da ka World Bank.
Da ong u wa utai u sarok da chah ieh tyngkreng kattu da palat 40-45 snem khlem da pynchna lane i chna thymme wei ini da booh ko ya ki paidbah hei eh wa khroo hei lai i wan.
Da pynsñiaw u leh yei sñiawngooh yaka chnat PWD wa ya ki heh sorkar kiwa da chimkhia wow pynyoh ya ka mang tangka wow chna ya u sarok Umsning-Jagi Road ka wow lai lyngba ki chnong yong ka Mawhati Constituency wei ini daw man ko i kyrkhu ya ki paidbah.
Heijooh i por u MLA da paan maap u na ki paidbah ka Mawhati Constituency hajrong i chimpor wei da ong wa da yakhun nadooh u snem 2018 wei mar ya jop haka Election MLA toh ka sarok kawa nyngkong dooh kawa da phah yei tyrwa, tangwa na ki daw wym ye u kiar da sahteiñ noh, wei katni kamwa da angnood wa i kreh chitom lang da waroh, uni u sarok daw mankaam noh u ha kini ki 6-7 bnai ki wow wan.
U Dasakhiat da ong chooh chooh u wa wot lada ym yakhun de ya ka Election MLA na Mawhati, tangwa da kular u wow booddien bait hawa yatoh wa utai u sarok wei da kyntu u ya ki paaid wa chong chnong wa ym toh u tieñ ki neibhah daw booddien bait lada boonkaam u katwon katwon leh ha Nongkrem.
