I poor u khñiang khlam COVID-19 ha East Jaiñtia Hills dang ku i kat dang mih ki sngi hadooh ynne i janmiet kiwa boon toh hapoh ka karkhana Star Cement, heiwa neiliang u DHS (MI) u Dr. Aman War da pyntip u wa ha East Jaiñtia Hills ynne ka sngi donhi kiwa dang chah ktah (Active Cases) hapoh ka District da em ki 112 ngut.
Ini i ku syndet kiwa yoh COVID-19 hapoh ka District toh hadien wa em hadooh kamwa 59 ngut kiwa yoh ya uni u khñiang ha Star Cement yeiwa da pyntikna ynnin ka sngi.
Ynne i janmiet won hawa yaklam wa kiwa pathai khubor, neiliang u Dr. War da pyntip u wa hadien wa leh ya ka Random Testing ha ka karkhana ka Star Cement da em hadooh 26 ngut kiwa yoh ya u COVID-19.
U Dr. War da pynrap u leh deiwa ong wa da phah khang (Seal) chwa ya kani ka karkhana chwa wow chim ya ka rai deiwi tawon.
Yeini da leh khnang wow ye u khang ya i psiah i mih cha wei na kani ka karkhana.