U Chief Executive Member ka Khasi Hills Autonomous District Council, u Titosstarwell Chyne da pyntip u wa ka KHADC da dep ko wow phah cha ka sorkar ya waroh ki pyrtuid ki chnong kiwa haap hapoh i pait yong ka Council.
Hawa jubab yeiwa kylli wa da wanrah da u MDC ka Mawphlang, u Lamphrang Blah ynne ka sngi ha ka Dorbar Lyiur, u CEM da pyntip u wa neiliang ka sorkar lyngba ka chnat DCA da paan ko ya i pyrtuid yong ki chnong nadooh ka 3 tarik Naichiphaw, 2020, wa neiliang ka chnat Elaka yong ka Council da paan ko ya ini kiwa da pyntip cha kiwa yahkhmat chnong, wei ha ka 2 tarik Naiynru ha ka yalang yong waroh 3 tylli ki ADC deilang wa u Montri ka DCA ka jylla wa ki sahep kiwa da pynsñiawthooh wa i paan ya ki pyrtuid yong ki chnong man ko katkam wa phah wa emkaam na ka 15th Finance Commission, khnang wa ka sorkar India u phah ko yei yarap cha ki chnong kamwa da leh ha ki Panchayati Raj.
Da ong u wa ka sorkar ym em lai lait ko ya ka Council, wei ka chnat DCA da pynsñiaw ko wa ka sorkar India kwah ko wow pynpsiah ya waroh ki pyrtuid yong ki chnong ha ka E-Gram Swaraj Website, heiwa da ong u leh wa i yarap poisa u e bait cha ki chnong wei daw mang hi da ka KHADC.
