Da psiah PDF ki 12 ngut ki MDC ka KHADC

Shillong: Ki 12 ngut ki MDC ka KHADC da psiah noh ki cha ka seiñ saiñ pyrthai wa thymme wa tip leh kam ka Peoples’ Democratic Front (PDF).

Kini ki MDC ki kynthup ki ya ka Grace Mary Kharpuri, u James Sylliang, u James Ban Basaiawmoit, u Latiplang Kharkongor, u Hispreaching Son Shylla, u Hadrian Lyngdoh, u Banteidor Lyngdoh, u Goodleader Son Nongsiej, u Arbinus Lyngdoh, u Victor Ranee, u Blandingstarwel Warjri wa u Morningstar Mawsor.

11 ngut na kini ki MDC toh kiwow yakhun ya ka Election MLA ha u 2018 katwa u Victor Ranee da pynbna u wa ym yakhun u ha ka.

Kini ki MDC kiwa psiah cha kani ka seiñ ynne ka sngi man ki leh ki dkhot wa pura yong ka Central Working Committee ka PDF.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Hawa yaklam wa kiwa pathai khubor wa kini ki MDC da pynsñiaw ki wa i daw wow psiah ki cha ka PDF toh ki seiñ wa boon hi hapoh ka jylla hadooh katni ym ye ki u leh ya ki phang kiwa ktah ya ka jaitbru kiwa kynthup ya i chna ya ki policy krehkaam waphær waphær neibynta ki khynroo khyllood, i chait i khiah wa kiwi kiwi.

Da pynsñiaw ki leh wa i kam pood ka MUDA da pyntlot ko yei bor ki Dorbar Shnong wa kiwi ki phang kiwa ktah ya ka riti synchaar wa ka rukom im ka jaitbru deiwa e i yaroh leh ya u CEM ka KHADC u PN Syiem deiwa ong wa oo da yieñ yaleh pyrchah u ya ka sorkar u Dr. Mukul Sangma.

Hanla kattæ leh da pynsñiaw ki wa ha ka tayaw wa khaddooh u Naikhynde u Pynshngain uwa da sdang ya ka PDF daw chimkti noh u kam uwa yahkhmat wa pura ka seiñ, tangwa ha kani ka yalang ym em u poi u.

Neiliang u president ka PDF, u Ivanlumlang Marbaniang da pynip u wa ka seiñ daw pynmih ko ya ka list wa nyngkong ki kyrtong ha u Naikhynde wei daw lai ko leh cha Jaiñtia Hills wa Garo Hills wow pynman yalang wow pynsñiawthooh paidbah ya ka thong ka seiñ.

U Marbaniang da kyntait u leh wa em i yalok ka PDF wa kiwi kiwi ki seiñ saiñ hima deiwa ong wa yeini daw pait hadien neibhah wa ka seiñ yooluti ko u jop ha u 2018.

Da pyntip u leh wa ka party dang haap pyndep ko chiboon ki kaam wa ka Election Commission of India (ECI), wei ka ECI da e ko soo tylli ki chaap wow jied neibynta ka party wei da thmu wow jied da u Khloor.