Ka sorkar jylla da man ko kawa da pynkhreh wow pdiang ya ka yalang G20 ka wow man ha Shillong ha ka 17 wa 18 tarik uni u bnai heiwa ynne ka sngi neiliang u Symbood Montri Rangbah wa pait ya ki kaam pohyung, u Prestone Tynsong da khut yalang u wow pait yei pynkhreh wow pdiang ya kiwa wan chimbynta ha kani ka yalang.
Kani ka G20 toh ka thup ki 20 tylli ki sorkar ri kiwa kynthup ya ka Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Türkiye, United Kingdom, United States wa ka European Union.
Da ong u leh wa daw em kamwa 120 ngut ki bru chemphang na kylleiñ ki ri ka pyrthai kiwa em ha kani ka Group 20 ki wow poi cha nongbah Shillong wei daw pynsah ki ha Marriott wei ya kani ka yalang leh daw pynman ha kani hi ka Hotel.
Neiliang ka sorkar da phah ko ya ki chnat waphær waphær wow pynbiang ya iwa emkaam waroh neibynta i burom ka jylla deiwa pynriam pynmiat ya ka sor, u pynbiang ya ki kari kamjooh i pynbait yei rukom pynlai kari yow lait nei sahkut.
