U montri rangbah ka jylla, u Conrad K Sangma ynne da ong u wa ka sorkar yaleh ko wow pynku ya ki kaam wa yatoh wow pynmiat wei wow pynwandur ya u sachram ha kiwa boon rukom hapoh ka scheme- “Jackfruit Mission” ya kawa da sdang ha u 2018 da ka Directorate of Food Processing heiwa da kyrchaan ya ki warep sachram deiwa esikai ya ki wei wow thooh leh ya ki yaaw.
Ynne ka sngi da pynman ya ka “Nano Jackfruit Entrepreneurs” ha College of Community Science, heiwa u Conrad da ong u wa ya u sachram da rep boon bha hapoh ka jylla katwa kamtæ daw rap ye u yarap ya ki warep heiyatoh wa u sachram.
Da yaroh u leh ya kiwa seiñ khih deiwa ong wa ka sorkar daw yarap ko ya ki khnang wow yoh myntoi kiwa boon wa lang deiwa ong leh wa ka Chief Minister’s Support for Producers Group, daw e ko T. 5000 cha ki bru kiwa kreh chirup wow chna ya ka seiñ wow kreh neibynta ka wi wei ka jooh ka thong.
Da ong u leh wa da pynlait T. 5 klur neibynta kani ka Jackfruit Mission heiwa ka sorkar daw thooh laad ko kammon wow pynmih yaaw ya kini ki mar ka ri Bangladesh, ki ri Arab wa kiwi kiwi.
Ha kani ka sngi u Conrad da yaklam u leh wa ki bru wa seiñ khih kiwa da kreh ha i bynta wow song ya ki baam ha Ri-loom Garo.
U DC ka West Garo Hills, u Ram Singh da khana u ya i myntoi wa yoh hawa baam ya u sachram.
Da yoh leh i klam na ka Dean ka College of Community Science, ka Dr. Pushpita Das, ka Dr. Dombe Warisa S Marak wa ki sahep na ka Directorate of Food Processing (DOFP).
