theme-sticky-logo-alt
theme-logo-alt
Advertisement ad1
Advertisement ad1

Da pynsñiawthooh wei Test ya ki koidi ka Jowai District Jail ya i kjut Hepatitis

Advertisement ad1
Advertisement ad1

Chibynta i kynmoo yaka World Hepatitis Day næ i kjut wa ktah ya u dohnood (Liver) yong ki bru, ynne ka sngi neiliang ka yung krehkaam u District Medical & Health Officer West Jaiñtia Hills da pynman ko i pynsñiawthooh hajrong kani ka kjut ha Jowai District Jail.

Katkam i khana ka Dr. E. Challam, Additional DM&HO Cum Nodal Officer District Viral Hepatitis Control Programme da ong ko wa ya kani ka jait yalang da jooh pynemburom khlieh u snem hajrong ka yurim yow chem yeini i jait kjut Hepatitis heipor wa smat wei yow yoh laad sumaar.

Advertisement ad1

U Dr. A. Hinge, Medical Specialist, Jowai Civil Hospital Ialong kam u bru chemphang, hawa e yei klam ong u kamwa ka phang prydi kani ka sngi hi ong ko “Hepatitis can’t wait” iwa mut ka kjut Hepatitis wym ye ko u yang neibhah lada slem u chem ya kani ka kjut ye u poi chei kjut wa boonjait wa ye u ktah won hadien, kamtæ i ye u chem heipor wa smat em hi i kyrmen wow yoh ki laad sumaar.

Hawa e pynsñiawthooh, da rap ban joor u yaki san jait ki kjut Hepatitis wa kynthup yaka A, B, C, D waka E. 

Ong u wa i chahktah u bru hei kjut Hepatitis A wa E toh lyngba ki baam wa ki um wa tngit, kamtæ yow yada emkaam u man kiwa lehkhooid hei baam, haka um wa dih wei kamjooh leh u sait bha ya ki kti hawa wan paiñkhana, wei kamwa 4-5% ye ki wow chitom joor deiwa thut noh u Liver. 

Hawa kyruiñ won u cha ka Hepatitis B, C wa D, ong u boonsien kini yohlaad ki u psiah ha i doh u bru lyngba ki snam yong uwa kjut cha uwi won hawa pynemkaam u jooh u thyrnia kam kiwa dih drugs, kiwa dung tattoo, neitæ i chongkha kulmar khlem ki laad yada, na ka manbei wa pun khon kawa da em chwa i kjut te bi cha i khonboo.

Hadien wa u bru yoh u ya kani ka kjut ki dak ki shin u mih ki hadien 3-4 bnai lyngba i iñdoh, khai-rih, kjut doh. Hadien ini ym bang baam de, kjut sa u kpoh, prai kat iwa baam wei stem ki khmat.

Em won ki bru wa chait wa khlan bha, ki dak ki chin ym mih ki wei ini booh ko hei maa ya kiwa yoh kani ka kjut neibhah u khñiang pynsih u yow Liver wei hadien wym kreh kaam de, suki suki daw  kylla Liver Cancer.

Kamtæ kamwa ka juk stad wa katni da thooh ki yaki laad ki luti yow yada yaki bru heipor wa dang biang, kyntu u ya kitu kiwa em ya kam kini ki dak ki chin, næ wot kitu kiwa sñiawthooh waki toh ki High Risk, toh u lai phah Test ki smat-smat cha ki thaw e sumaar khnang yow yoh ki laad yada næ ki laad sumaar.

Heijooh i por da pynche haroh u wa kammon u yada wei sumaar na kini ki 5 jait ki kjut Hepatitis.

Ha kani ka sngi da yoh leh i klam na u Union Kyndiah, Superintendent District Prison, chirup i emlang u Batskhem Nongbri, Jailor wa kiwi kiwi.

Hadien wa kut ka yalang, da pynman leh i leh Test Hepatitis ya ki koidi wa em ha kani ka District Jail.

Share this:
Previous

Ka Ïongkhuli haap ko hapoh ka Hima Mylliem, kyntu ka Hima ya ka sorkar wow tuklar smat

Next

Sdang biang i yakhih neidaw wym pynkrehkaam ka sorkar pyrdi ya ka ILP: JSU