theme-sticky-logo-alt
theme-logo-alt
Advertisement ad1

Ka Ïongkhuli haap ko hapoh ka Hima Mylliem, kyntu ka Hima ya ka sorkar wow tuklar smat

Advertisement ad1
Advertisement ad1

Ka Dorbar yong ka Hima Mylliem da beiñ joor ko yei toor pood yong ka sorkar Assam ha ka chnong Ïongkhuli, kawa dang haap hapoh ka Raid Marwet wa ha i pait ka Hima Mylliem. Ha i jooh i por neiliang u Syiem ka Hima, u Paiem Ainam Manik Syiem da beiñ joor u leh ya ki pulit Assam kiwa da ktah kti ya u MDC ka Mawhati, u Charles Marngar khlem da burom de ya kiwa mihkhmat wa da jied da ki paidbah.

U Montri K. Langstieh uwa man leh u Chairman ka Border Committee yong ka Hima Mylliem da ong wa ki em ki ya ki dulir hawa yatoh wa ki thaw ha Ïongkhuli, heiwa da pyntip u leh wa ha i por wa nachwa ki tre thaw da e wai ki ya i thaw cha ka chnat Forest kawa da pait wow pynneh ya katai ka thaw, wei ha u snem 2014-15 hadien wa da kut i por, ka chnat Forest da ekti biang noh ya i thaw cha ki tre, wei hadien itæ da sdang wow lai chna yung ki bru na Assam wei da yohlaad ki wow sdang psiah chooh chooh.

Advertisement ad1

Da ong u wa chwa wow em iwon iwon i eh næ chah ktah, ka Hima daw khut noh ko ya kiwa yahkhmat chnong ha katai ka thaaiñ wa kynthup na ka chnong Ïongkhuli, Barapathar, Umtyrnga, Mawiong, Maikhuli wa Pillangkata. Da ong chooh chooh u wa ka Assam ka pait bha ko ya ki thaw yong ka Hima kiwa em ha khappood, wei da pynsñiaw u wa ka Hima dang thooh chooh chooh ko ya ki kot ki sla yow phah cha ka KHADC neibynta wow pynyoo yei mantre neibhah ka Assam ym em hok ko wow kam ya katai ka thaw.

U Paiem Ainam da beiñ joor u yei leh embor yong ki pulit Assam ha ka chnong Ïongkhuli, deiwa kylli ya ki chrot bordiñ wa da thung da ka MeECL, wei khamtam ye wym burom ya uwa mihkhmat. Da kyntu leh ya ka sorkar wow pynbait noh yei eh wa yatoh wa u pood u ang wei wow pynneh ya ka chong suk chong saaiñ ha ka thaaiñ.

Hawa kylli, u Paiem da pyntip u wa neiliang ka Hima ym em e pata lane dai ko ya ki thaw cha ki bru ki wym toh kiwa na kani ka jylla, wei katkam ka thup wa da yoh da ka Hima, em du ki Khasi, Jaiñtia wa Garo kiwa mantre ya ki thaw, katwa u Montri Langstieh da pyntip u wa em kiwi ki jaitbru kiwa yoh thaw nadooh ki por wym pu em pynkrehkaam ya ka Land Transfer Act.

Neiliang u Montri, u MB Kharlukhi da ong wa ka Ïongkhuli ym toh kawi na ki 12 tylli ki thaw wa em i ya kajia, tangwa i leh embor jong ki pulit Assam pynyoo ko wa ym burom de yei sñiaw kiwa chong chnong ka thaaiñ wa i sier ya ki paidbah.

Share this:
Previous

Ha ka 30 tarik u pynbna Result HSSLC ka MBOSE

Next

Da pynsñiawthooh wei Test ya ki koidi ka Jowai District Jail ya i kjut Hepatitis