Shillong: Hadien wa sdang i ya pynbaad mar kylliang hapyrdi ka Bharatiya Janata Party (BJP) wa ki seiñ ha ka sorkar synrop ka Meghalaya Democratic Alliance (MDA) wa yahkhmat da ka NPP hajrong i baam-tooh ha ki ar tylli ki Autonomous District Council (JHADC wa GHADC), neiliang ka sorkar da thung ko ya ka dhab wow takit ya ki yukheiñ nadooh u snem 2015.
Hawa yaklam wa u montri ka chnat District Council Affairs, u Lahkmen Rymbui da ong u wa da thung ya ka dhab wow takit ya ka yukheiñ namo i thooh bniah ya i pynlut ka JHADC wa GHADC wei da lai i chakhmat wei ini i toh du neibynta ka Special Assistant Grant na ka sorkar pyrdi wei ym toh yei rukom thung kreh wa kiwi ki kaam ha kini ki ar tylli ki Council.
Heiyatoh won wa i por wow pyndep ya i takit, neiliang u Rymbui da ong u wa da kyrmen wow yoh smat ya ka bui (Report) na kani ka takit deiwa pynrap leh wa ka sorkar manda yoh ko ya kani ka bui daw chong bichaar bniah ko hajrong yong ka khnang wow ye u leh yeiwa emkaam.
Heiyatoh wa ka yalang ka Coordination Committee yong ka sorkar MDA da ong wa i pynbaad ka BJP toh iwa khlem yurim wei u Rymbui da ong u leh wa i thung ya ka dhab wow takit yeini da man i iwa chongñia neibhah neini daw tip yeiwa sakhiat waroh.
