theme-sticky-logo-alt
theme-logo-alt
Advertisement ad1
Advertisement ad1

Da sdang ya ka SAANS wow yada nei yap kjut ki khynnah ha Meghalaya

Ka sorkar jylla ynne ka sngi da sdang ko ya ka SAANS (SOCIAL AWARENESS AND ACTIONS TO NEUTRALIZE PNEUMONIA SUCESSFULLY) ha Ganesh Das Hospital, Shillong. Ka thong yong ka SAANS toh wow yada ya ki khynnah kiwa hapoh 5 snem i rta na i kjut Pneumonia wa Diarrhoea.

Ha kani ka sngi da yoh ya ki kyntien pdiang burom na u Dr. R.F. Tariang, Director of Health Services (MCH&FW) wa ki kyntien waiphang na u Dr. P. Manners JT DHS (MCH&FW) cum Nodal Officer Child Health. 

Neiliang u Dr. Manners da kdaw u wa i kjut Pneumonia toh iwa haphrang dooh wa wanrah ya ki khynnah wow dooh ki yei mynsien yong ki heiwa em hadooh 1 lak ngut kiwa yap na kani ka kjut hapoh ka ri wei ka jylla da em 800 ngut ki khynnah kiwa yap na kani ka kjut ha ka chi bnai deiwa kyntu ya ki manbei wow sumaar bha ki ya ki khon yong ki.

Ka Dr. H. Giri, Indian Academy of Paediatrics hawa e yei klam da ong ko kammon wa ye ki wow tip wei wow pait ya ki dak ki chin ya ka kjut Pneumonia, kiwa kynthup ya i thut wow riñ mynsien, ky’oh, iñ-doh, wa raw wei dap rupai. Da ong ko wa emkaam wow lai phah pait ha kiwa kreh ha ka chnat i chait i khiah yow ye u tip lada em chitom Pneumonia. Heiyatoh wa ka Diarrhoea da ong ko wa ini warah i yei raw ha i doh i pran ki khynnah kiwa hapoh 6 bnai wei iwa emkaam dooh i baam wow e ya ki toh i dud yimbu ka bei. I e yimbu dang smat pyntikna i yei emkaam marbaam ki khynnah khonboo kiwa hapoh 6 bnai wei wot hadien itæ dang emkaam wow e yimbu chirup wa kiwi ki baam hadooh wa dap ki 2 snem. 

Ka Dr. Giri da yaklam ko leh wa ki manbei kiwa em ha kani ka sngi heiwa kawi na ki manbei da yoo ko ya ki dak ki chin ha i khon ko iwa 1 snem 10 bnai wei da wanrah ya ini i khon wut-wut cha thaw sumaar wow yoh ya i dawai.

U Ramkumar S IAS, Mission Director, National Health Mission hawa e yei klam ha kani ka sngi da ong u wa ka Maternal Mortality Rate (i yap ki manbei) wa ka Infant Mortality Rate (i yap ki khonboo) hapoh ka jylla man i iwa heh bha hawa nujor wa kiwi ki jylla ka ri wei da ban joor u wow lai langær cha thaw sumaar heipor wa pun wei hadien wa kha namo ka Ante Natal and Post Natal Checkup. Da ong u wa emkaam bha i krehlang hapyrdi ka chnat chait i khiah, ka chnat bhalang wa ka chnat puræ puthi heiyatoh wa ini i kaam. 

Da pyntip u leh wa ki ASHA kamjooh kiwi ki wakreh ha ka chnat i chait i khiah da sikai ya ki kammon wow tip ya ki dak ki chin yong i kjut ha ki khynnah wa khonboo heiwa hanla em ki manbei kiwa da yoh khon boon ngut tangwa ymtip ki wow pait ya ki dak ki chin yong ki kjut. 

Ha kani ka sngi da pynkut ya ka yalang da ki kyntien khublei na ka Dr. M Bareh Jt. DHS & MD Ganesh Das.

Ki wakreh ka chnat leh da lai pait ki ya ka SNCU–Sick Newborn Care Unit ha Ganesh Das Hospital wei da ekti leh ya ki tupri wa ki muja cha ki manbei yong ki khonboo wa dang kha wot. 

Share this:
Previous

Daw bichaar bniah ya ka ujor pyndooh MLA ya ki 12 ngut: Metbah Lyngdoh

Next

Thoh ka FKJGP cha u SP wa boon kiwa dai drugs ha ki yaw ka East Jaiñtia Hills