Ka kyrtong MP yong ka NPP na Shillong, ka Dr. M Ampareen Lyngdoh da ong ko wa waroh chi kattu ki paidbah ym sñiaw emkaam ki wa em ya kiwa mihkhmat MP, wei da ong ko leh wa katni da slem bha em itæ i ya jngai hapyrdi ki MP wa ki paidbah.
Kamtæ da ong ko wa lada jop ko kam ka MP da kular ko wow emlang bait wa ki paidbah wei ki paidbah daw yoo ki wei daw ap ko leh ya ki paidbah, wei pynrap ko wa kani toh ka thong kawa ka da booh ko wow pynyajan wa ki paidbah, wei hadien wa jop daw wan uiñ biang ko cha ki paidbah.
Ka Dr. Ampareen kawa man katni kam ka MLA na East Shillong heijooh i por ka Montri sorkar da ong ko wym em khulslai ko katwon ngut ki kyrtong kiwa mih ha kani ka Election, tangwa iwa sñiaw emkaam toh wa kam ka seiñ kawa synchaaar toh u pynsñiawthooh ya ki paidbah ya ki phang wa em ko wow wanrah ha kani ka Election MP.
Ka Dr. Ampareen kawa jooh man kam kawa yahkhmat wa ka MLA warim yong ka Congress wei da ya krehlang ko leh da boon snem wa u kyrtong ka Congress uwa man kam u MP katni, u Vincent H Pala. Hawa kylli hajrong ini, da ong ko wym tip ko hadooh katwon u em i ktah ya u kyrtong ka Congress, tangwa da ong ko wa kam ka kyrtong u pynlut ko yei bor du ha ki phang krehkaam wei wow pynmankaam yei klur wa kiwi de.
Ka kyrtong yong ka NPP da pynsñiaw ko wa ym kwah wa ha kani ka yalap Election u kynthah yei man yong samen uwon uwon næ wa kiwi ki seiñ u kynthah ki, tangwa da ong won wa hap wow klam won ya ki bru kiwa da mihkhmat boon snem kam ki MP wa kiwa duna ki kaam wa da yoh u yoo, neibhah toh iwa emkaam wow klam yeini khnang wa ki paidbah u sñiawthooh wei u mih ki yow lai thap ya ki Vote yong ki.
Discussion about this post