U Montri ka chnat Puræ Puthi ka jylla, u Rakkam A Sangma ha ka yachem wa nyngkong u wa ki sahep ka chnat, da ban joor u yei emkaam wow pynbha pynmiat ya ka kaam puræ puthi wei wow pyndap smat ya waroh ki kreh yong kiwa sikai ha ki Elementary skur ka sorkar, wow pait bniah bha ya ka State Curriculum Framework (SCF) yow yahaap ko waka National Curriculum Framework (NCF) ka wow man katkam ka New Education Policy 2020, wow chim kabu yei yarap ka sorkar wow pynku kyrdan ya ki thaw puræ puthi, u pynbha pynmiat yei e sikai deiwa booddien yei krehkaam ki khynnah lyngba ka Child-Tracking System hapoh ka Vidya Samiksha Kendra kamjooh yow pynmiat yei rukom e tulop kiwa sikai.
U Rakkam da pyntip u leh wa da phah ya ka chithi yow kyrpaad wow pynlait ya ka jylla na ka CUET neibynta kiwa lai puræ ya ka Under Graduate neibynta uni u snem puræ wei ya kani ka chithi da phah lyngba ka yung krehkaam u Montri Rangbah.
Chooh chooh da pyntip u wa ha kani ka chithi da paan por hadooh ka 31-03-23 yow pyndep yei thap pyrtuid ya kiwa yaleh CUET neibynta kiwa napoh ka jylla Meghalaya wei ya kani ka chithi da phah cha u Director General, NTA, New Delhi, deiwa e daw wa i em ka Election MLA da pynslem yei ye u pynman ya ka State Board Exam heiwa kiwa boon wa sah cha ki thaaiñ palatsor da chem chitom ki wow yaleh (Apply/Register) lyngba ka Wesbsite ka CUET heijooh i por kini kiwa sah cha palatsor da chem chitom ki wow yoh ya ka Internet wei em leh kiwa sah cha ki thaw wa jngai wa chitom u poi u lai.
U Montri da lai pait u leh ya ka Directorate of Educational Research & Training wei da kyntu u leh ya waroh ki bru ka chnat wow kreh chitom chooh chooh ki yow pynku ya ka puræ puthi hapoh ka jylla.
