U Dr. Jemino Mawthoh State Secretary UDP, ong u wa i em ki MLA UDP wa kreh chitom u yah luti ya ki paidbah ha kani ka kynti da yoo wa kiwi won ki Party da sdang ki u wan paan yaka Ticket UDP neibynta u yakhun Election, wei kani pynyoo ko wa da toh biang i por yaka UDP u pynmih biang 7 tylli ki yuspong na Ri-loom Jaiñtia kamwa man ha u snem 1998.
Kamte yooluti u wa ha u snem 2023 ki paidbah ka East wa West Jaiñtia daw jied biang ki ya kiwa mihkhmat naka seiñ UDP neibhah ka la-ær wa beh haka jylla leh toh kawa sñiawsuk.
“Heipor wa nga yeiñ yakhun Election MP, sñiaw O ka la-ær wa klam ki Party Ri-Thor khamtam ka Congress wa ym myntoi u jied yaka Party ri-loom neibhah wa kut ko du ha Khanapara. Kwah O u booh yukylli heiwon ka Congress em ko katni neibhah ki 17 ngut ki MLA da yut lut ki naka,” da ong u Jemino.
Hawa kyruiñ won u chei man i long ka jylla, ong u wa yoo u chiboon i eh i khoo wei iwa rap diaw chooh chooh toh wa ka muna poisa yong ka jylla wym em man kawa biang, hajrong ini booh yukylli u wa kammon u ye ko wow pyndap pynbiang yei emkaam u paidbah.
Kyrmen skem u wa i sdang kyruiñ khmat ki paidbah cha ka Party daw wanrah ko wa ha u snem 2023 ka UDP daw yoh ko u yahkhmat yaka jylla.
Heiyatoh i pynbait ya u pood u ang, ong u wa dadep e yumut ki yaka sorkar wa emkaam u paitbniah biang yaki thaw wa dang em ki kynrum kynram, khnang wa i jynjar i saja wym jia de ki ha kiwi won ki thaw wa dang sah.
Neitæ hajrong i mih i psiah ki bru cha ka Party won ong u, kiwa mih naka Party toh kiwa chet kylla kiwa wan won toh kiwa kylla wamut.
