U Montri Rangbah ka jylla, u Conrad K. Sangma ynne da wai u ya ka Engineering College wa nyngkong dooh wa tip kam ka Shillong Government College of Engineering hei emlang u Montri ka chnat Puræ Puthi u Lahkmen Rymbui.
Kani ka College toh kawa da chna hapoh ka Rashtriya Uchchatar Shiksha Abhiyan (RUSA) ha i dor wa T. 26 klur wei em ko ha i thaw wa heh 7.8 Acres, hapoh ka jooh ka thaw namo ka Campus ka Shillong Polytechnic (16.11 Acre) ha Mawlai Kynton Massar, East Khasi Hills District.
Hawa e yei klam u Conrad da ong u wa ka sorkar katni kreh ko neibynta ki khynroo khyllood ha kini ki san snem wa da lai, wei deiwa pyrkhat yeini da sdang ko leh boon ki kreh.
Da ong u wa ha ki san snem wa dadep da yatoh kaam ka sorkar wa ki 90,000 ngut ki khynroo wow pynwandur ya ka mynried yong ki. Da ong u leh wa da leh ya ki kaam wow yarap seiñ kreh, ki yalehke Sports, i rwai i siaw wa kiwi kiwi.
Chooh chooh da batai u leh ya ki rukom kreh wow pynjanai ya ki thaw e sikai deiwa wanrah leh ya ki kaam wa har rukom nadooh i chait i khiah wa i bor pyrkhat ki khynnah.
Da ong u leh wa emkaam wow pynku yei stat i tip yong kiwa da em i rta 20 snem chajrong, wei ka sorkar da sdang ko ya ki Programme waphær wow pyntikna wa biang i baam ki khynnah wa kamjooh i rukom e sikai ya ki.
U Conrad da pynbna u leh ya ka skurbah ka jylla namo ka State University ya ka wow tip kam ka Captain Williamson Sangma State University, ya kawa da wai ha Balalgre, hajan Tura.
Kani ka Engineering College u e sikai ko ya ki le tylli ki Degree kam ki Technical Branch wa kynthup ya ka Civil Engineering, Electrical Engineering wa Mining Engineering ki wow pdiang 30 ngut ha ki le chnat (Branch).
Ka sorkar da chna ko leh 55 tylli ki kreh wa kynthup ya 36 ngut kiwa sikai wa 19 ngut kiwa ymtoh kiwa sikai (Non-Teaching), ka Shillong Govt. College of Engineering (SGCE), Shillong da paan bor wei daw pynyabi leh ya ka wa ka NEHU wow sdang ya kani ka College.
Neibynta u snem puræ (Academic Year) 2022-23, ka Shillong Govt. College of Engineering (SGCE), Shillong da booh ko ya ka Online Application wow pdiang da ka AICTE wow sdang ya i e sikai ya kini ki Technical Course, heiwa kani ka Website dang em ko kattu katni i duna ya kiwa daw pynbait noh khnang wow ye u sdang noh ya ka e sikai ha u snem 2023-24.
