Ka yung krehkaam ka Aditya Birla Sun Life Insurance Co. Ltd, Jowai Branch kawa em ha Ladthadlaboh, Jowai da wai ya ka ha ka 26 tarik uni u bnai ha ka yalang wa pynlai da ka Rinibeth Patlong kawa man kam ka Financial Adviser kani ka yung krehkaam.
Da yoh yei klam pdiang burom na ka Niawki Dkhar kawa man kam ka MRA Advisor wei u kongsan ha kani ka sngi toh u Rajendra Sharma uwa man kam u Senior Regional Manager yong ka Birla, Guwahati Region.
U symbood kongsan toh u Dr. Banjop Dkhar, Senior Medical Officer yong ka Dr. Norman Tunnel Hospital, Jowai deiwa emlang leh u Dolloi ka Elaka Jowai, u Puramon Kynjing, u Dr. Tennyson Suchiang uwa man u tre yong kani ka Building wa em kani ka Office, u Mondaystar Dkhar uwa man u Branch Head yong kani ka Office wa kiwi kiwi de ki waheh.
U kongsan hawa e yei klam yong oo da ong u wa ka Birla toh ka Company kawa da krehkaam katkam ka juk kawa katni (Technological Advancement) wei man ko ka Company kawa heh bha hapoh ri India.
U Pa Dolloi hawa e yei klam da kyntu u ya kiwa kreh yong ka Birla wow man chooh chooh ki kiwa kreh chitom wei wym hoi u man ki kiwa sarong yeiwa da yoh ki ya kani ka Office.
U Dr. Banjop Dkhar da e yaroh u ya kiwa kreh yong ka Birla khamtam kiwa em ha Jowai Branch wa man ki ki bru kiwa chemphang wa kiwa ye u chaniah.
U Branch Head yong kani ka Office da pynsñiaw u cha kiwa kreh yong ka wa toh u man ki kiwa em i kitkhlieh neibynta ki Customer yong ki wei wow yarap yeiwa emkaam ki. Chooh chooh da ong u wa i kaam kiwa kreh yong ka Birla toh u e ki i yarap cha ki khon yong ka Ri Jaiñtia khamtam lyngba ki Scheme kiwa kynthup nadooh ki Children Education Plan, Retirement Plan, Savings Plan, Wealth Creation Plan wa ki Protection Plan.
Da pynkut u yei klam yong oo deiwa e khublei u ya waroh ki Customer yong ka Birla wa em ki yei mynsien khrehlang. Da kyntu u leh ya ki Customer yong ka Birla waroh kiwa em ha Jaintia Hills wym toh u sñiawphær ki yei wym ye u khutlang ki ha kani ka sngi neidaw wa tbian i por, tangwa ye ki u wan mih cha ka Office ha ki sngi wa man kreh, wei yooluti u leh wa daw yoh u yachem chooh chooh neini chakhmat ha ki kaam kiwa boon.
Da pynphooh pynphieñ ya kani ka yalang lyngba i chaad tynre na ka Moopyllait Syiar wa ka Mookyniang kiwa haap hapoh ka Dorbar Chnong Khliehtyrshi kiwa da wan yah ya kini kiwa chaad cha kani ka yalang lyngba i yarap yong u Hamedeibor Phawa uwa man kam u President yong ka Seiñ Raij chnong Khliehtyrshi.
Da pynwai ya kani ka yalang da ki kyntein sñiawngooh na u Ebormi Sutnga u wa man kam u Agency Manager yong kani ka Office.
Discussion about this post