U Vice President ka United Democratic Party (UDP), u Robertjune Kharjahrin da ong u wa i pynkrehkaam ya ka Article 371 waka Sixth Schedule heijooh i por daw em i ya tyngkhooh hanla ym em man ki i jooh tangwa ka thong ki yasariem ki, wei u pynkrehkaam ki heijooh i por man i kamwa chong ar tylli ki kari heijooh i por hawa lai luti.
Da ong u wa iwa yaklam kattæ ya ka Article 371 toh yow lait nei pynkrehkaam ki aiñ ka sorkar pyrdi ha ki thaw yong ki paidbah ri-loom deiwa e nongmuna u wa iwa dawa kattæ toh kamwa yoh Article 371A wa Article 371G kiwa krehkaam ha Nagaland wa Mizoram.
Da pynkynmoo won u leh wa chwa wow pynkrehkaam ya ka Article 371 ha Mizoram, jooh em ko ya ki District Council tangwa da hap pyndam noh ka wei ki le tylli ki District Council wa em kattæ kitæ ka Lai, Mara wa Chakma Autonomous District Council toh neibynta ki bru wa khian paaid ki wym toh ki Mizo wei ha Meghalaya leh ye u jia i jooh lada pynkrehkaam ya ka Article 371 heiwa kiwa khian paaid kam ki Koch ki Hajong ye ki wow dawa wow yoh noh ya ka District Council neibynta yong ki yow yada yei hok ki. Kamtæ da kylli u wa lada pynkhreh i wow leh kamni?
Heiyatoh wow yada na ki aiñ ka sorkar pyrdi, da ong u wa em ka kyndon ha ka Paragraph 12A (b) ka Sixth Schedule kawa ong wa u President ka ri ye u wow pyndam yei krehkaam kawon kawon ka aiñ ka sorkar pyrdi ha ki thaw wa em ka District Council.
Kamtæ da ong u wa da emkaam wow pynjania chwa ya iwa da em ha Sixth Schedule neibhah man ko leh ka aiñ wow yada yei khyndaw u chyiap kamjooh yei mantre yeiwa da em cha i wei e bor ko leh wow synhcaar pyn da i ya i katwa ka Article 371 won i bor da lai ko cha ka sorkar jylla.
Discussion about this post