Shillong: U MDC ka Congress na Mairang, u Batskhem Ryntathiang ynne ka janmiet da pynbna u wa da dam noh u wow kyrchaan yaka kynhun United Democratic Forum (UDF), hanlada ha kani ka kynhun ki em ki hadooh 9 ngut ki MDC na ka Congress.
“Nga ym hun de i mynsien wow paitke ya i knieh bor wa ya i jæd yong ka ri waka jaitbru,” da ong u Batskhem hawa klam wa kiwa thoh khubor.
Da ong u wa ym em wa ye u pynbor ya oo hajrong kani ka rai, la da ka bor poisa næ da ka chuki neibah da pynchong yurim bha ya i long i man ka District Council. “Nga ym bien O wow man EM ha kini ki san snem,” da pynrap u.
“Ki kaam yong ka Council ym lai de ki neibhah da boonkaam du wow taan bru wei wow beh du yaka chuki, ki CEM leh ha ka san snem wan ki hadooh 5-6 ngut,” da pynrap chooh chooh, “Nga da chim ya ka rai wa lada nga hap O wow kyrchaan ya kani ka EC kawa rim wow jied CEM, u thap Vote khaddooh neibynta kani ka san snem wei lait neitæ ym thep Vote CEM de, nga u yieñ bait O samen.”
Hawa yaroh ya ka Executive Committee warim wa yahkhmat da ka United Democraetic Alliance (UDA), u Batskhem da ong u wa kam ki bru, em i duna heini heitai, tangwa katwa ye i bor da pyrchang ki wow leh ya iwa biang tam.
“Nga e burom khamtam ya u Paul Lyngdoh uwa da kreh chitom hadooh wow pynman ya ki nongkhayi baar jylla wow wan pyndem hakhmat ka KHADC. Nga sñiawsih wow tip hawa haap ka EC warim, ki dkhar ki da baam mithai wei da chaad kmen ki, neibhah wa uni u chieh wa dung ki da lait ki na oo noh katni,” da ong chooh chooh.
U Batskhem da pynsñiaw u leh yei sñiawsih leh wa ha KHADC, ki MDC toh kiwa para Khasi, tangwa em ka yaleh pyrchah.
“Cheiwon ka mynstep ka ri wa ka jaitbru, lada ka yaleh man ko du para i, kiyi won wow yada ya ka jaitbru,” da kylli u deilang wa i joo umkhmat.
“Kani ka EC wa thymme du wow yoh ya ki EM leh da hap wow rah chadooh ka High Court, lada kamtæ ka yakhun yong ki toh neibynta ka jaitbru næ neibynta i bor yong samen, nga booh O i kyntu wa neini chakhmat ya ki paralok yong i ha District Council wa em du para Khasi suda hawa yoo i yei bakla i duna yow ya tei i, neibhah i pynhaap yaka EC na i por cha ka por da dooh burom,” ong chooh chooh u MDC ka Mairang.
Da ong u leh wa da sihlet wow embynta yow pynhaap yaka EC wei hadien wa haap ko da sñiaw u yei bakla hadien wa pyrkhat u ya ki kaam ka EC warim wa da leh ko katwa ye i bor.
Da pyntip u leh u man hi u kam u MDC yong ka Congress wei burom u leh yaka Party kawa pynjop ya oo.
“Nga ym yieñ pyrchah O yaka Party Congress wei u man hi O u bru Congress tangwa ym em ka aiñ kawa khang wa u Congress ym ye u wow maya yaka jaitbru,” da ong u Batskhem.
Discussion about this post