U Montri wa pait yaka chnat puræ puthi hapoh ka jylla, u Lahkmen Rymbui da pyntip u wa ka chnat dang bichaar bniah ko neibynta wow pynku ya ka tulop kiwa sikai skur Adhoc hapoh ka jylla.
Hawa jubab yeiwa kylli wa da wanrah da u MLA ka Mawphlang, u Syntar K Sunn ynne ka sngi hapoh ka Yung Dorbar, u Rymbui da pyntip u wa ka sorkar dang pyrkhat ko wow pynku ya i tulop kiwa sikai Adhoc manda yoh poisa, neibhah kamwa man katni, ka jylla em ko hapyrdi i duna poisa.
Katkam wa pyntip u Montri, ki skur sorkar waroh hapoh ka jylla em ki 1225 tylli ki Lower Primary, 844 tylli ki Upper Primary wa 386 tylli ki Secondary. Katwa kiwa sikai ha kitai ki skur em ki 2450 ngut neibynta ki LP, 3376 ngut neibynta ki UP wa 2139 ngut kiwa sikai ha ki Secondary.
Hawa jubab chooh chooh u Rymbui da pyntip wa i su ya i tulop cha kiwa sikai Adhoc man ko T. 12,000 chi bnai neibynta kiwa sikai ha ki skur LP, neibynta kiwa sikai ha ki skur UP won ya ki Head Teacher da su T. 18,000, Assistant Teacher T.16,000 chi bnai, katwa ya kiwa sikai ha ki skur Secondary T. 20,000 chi bnai cha waroh kiwa sikai, wei ini man ko ha waroh ki District ka jylla. Da pyntip u wa i pynku tulop khaddooh ya kiwa sikai toh nadooh u Naikhynde yong u snem 2016.
Hawa jubab won yeiwa kylli pynrap yong u MLA ka Congress na Mawsynram, u Himalaya Shangpliang, neiliang u Montri da pyntip u wa ka sorkar da pynlut ko T. 181 klur man-u-snem wow su ya i tulop kiwa sikai Adhoc ha ki skur Lower Primary wa Upper Primary.
Da pyntip chooh chooh wa ka sorkar ka emkaam poisa ko sa kamwa T. 251 klur neibynta wow pynku tulop kiwa sikai Adhoc yow pyn ya ryngkat wa kiwa sikai skur sorkar. Katkam wa ong u Rymbui, ka sorkar jylla ka emkaam ko sa palat T. 500 klur wow pynku ya ka tulop kiwa sikai Adhoc wa SSA hapoh ka jylla.