Kiwa yahkhmat yong ‘Ka Sur ki Nong Mawlai’ nadooh ka 31 tarik u Naisaphra da lai ki wow saam da ka chithi wow dawa kyrchaan na ki 35 ngut ki MLA ka ri Khasi-Jaiñtia yei dawa pyndam kreh chipor ya ki le ngut ki heh pulit kiwa emkti wow siat ya uwa yahkhmat warim ka HNLC ha i step yong ka 13 tarik u Naisaphra.
Katkam wa pyntip u Donboklang Kharlyngdoh hadooh katni kiwa da soi ya katai ka chithi wow e kyrchaan da em ki 4 ngut wa kynthup ya u MLA ka Congress na Mawlai, u Process T Sawkmie, u MLA ka Congress na Mawsynram u HM Shangpliang, u MLA ka KHNAM na North Shillong u Adelbert Nongrum wa u MLA ka HSPDP na Sohïong u Samlin Malngiang.
Uwa yahkhmat ka kynhun na Mawlai da pyntip u leh wa dang em chooh chooh ki MLA wa daw lai booddien biang ki mynstep ka sngi, lada bien ki næ ym bien wow kyrchaan ya i dawa yong ‘Ka Sur ki Nong Mawlai’ lyngba ka chithi wa da phah daw lai chim noh chwa wow sdang ka dorbar.
Hajrong i wym bien wei artatien u Renikton L Tongkhar wa kiwi ki MLA Khasi kiwa em ha ka sorkar MDA ya itai i dawa, u Kharlyndoh da ong u wa kini ki MLA ym toh wa kwah ki wow ya syllok wa ki para MLA næ wa ka RDA, tangwa toh neidaw wa hap ki wow yasyllok wa u Conrad Sangma neibhah wa tieñ ki wa ya dooh chuki ki.
Da pyntip wa hadooh katni ki MLA ka UDP, PDF ym pu em soi ki, deiwa ong wa ki toh u kylla wamut noh yow yoo ka jaitbru deiwa che wa uwon uwa mihkhmat wa du neibynta ka chuki wei uwon uwa mihkhmat neibynta ka jaitbru, neibhah kini ki chithi daw phah leh cha ki Constituency.
