Shillong: Ka Khun Hynniewtrep National Awakening Movement (KHNAM) ha ka sien wa soo da lai sylli ki yei wan ki bru na baar jylla wow phah sumaar ha NEIGRIHMS neibhah wa katkam i ong kiwa chong dukan hajan kani ka thaw da ong ki wa man ka step ym duna ya soo tylli ki bus na baar jylla kiwa wan phah sumaar ha kani ka Hospital.
Ka KHNAM hei sylli ko yeini da phah pynyoo ko ya ki kot ki sla kini ki bru wow pynsakhiat lada man ki kiwa na India heiwa da chem wa em ki kattu katni ngut ki wym biang ki kot ki sla deiwa e daw wa mylliñ ki ya ki Xerox yong ka ki EPIC.
Hawa klam ya kiwa pathai khubor u president ka KHNAM-Youth Wing, u Thomas Passah da ong u wa i wan yong kini ki dkhar da wanrah ya u dak kylli wa heh bha wow pynsñiaw wa du na Silchar wan phah sumaar ki da ki boon tylli ki bus deiwa kyntu ya ka sorkar wow chimkhia yeini.
Da ong u leh wa neiliang ka KHNAM dang pteiñ ko wow sylli yeini neibhah man ko ka kaamram wow yada ya ka ri.
Chooh chooh da ong u wa ka KHNAM da chem ko wa kini kiwa boon hi kiwa wan phah sumaar sah ki ha ki yung wa em ha sor Shillong deiwa kyntu ya ki Dorbar Chnong wow pait bha ki yeini.
Katwa neiliang u Working President ka KHNAM, u Adelbert Nongrum da ong u wa hanlada ka KHNAM ym em bor ko tangwa em won ko i mynsien kitkhlieh deiwa kylli wa kammon kini ki dkhar da kjut chitom ki neibhah wa da ki 4 namo 5 bus u wan ki wan ka sngi.
Heiwi i liang nawon da ong u wa tieñsar ya boi kini ki bru u yoh ki u pynpsiah pyrtuid ha ka Electoral Roll yong kani ka jylla neibhah wa ka sorkar booh thong ko wow pynpoi cha ka 18 lak ngut kiwa thap vote.
Discussion about this post