Hadien wa mih Wyrta wa ong wa mih ki dkhot ka TMC wow psiah cha ka NPP ha chnong Sohmynting, ynne ka sngi kiwa kyrchaan yong u Awhai Andrew Shullai uwa man leh u kyrtong ka TMC na Jowai Constituency da kyntiat ki ya kani ka khubor deiwa ong wa kitu ki bru toh du ki bru ka NPP hi-eh.
Neiliang u Sohlang Mukhim uwa jooh man kam uwa kyrchaan ya ka NPP ha u 2018 da ong u wa heini i por da em 300-400 ngut kiwa kyrchaan ka NPP kiwa da psiah cha ka TMC khnang wow yoo yei kylla ymtoh kam ka sorkar NPP kawa heipor kjam khut ko ki tangwa manda chit da pynman jhep hi-eh ko ki wei emkaam ya uwa mihkhmat uwa klam ya ki, uwa nood u yasaaid hapoh yung dorbar ka jylla. Da ong u leh wa lada em wa mih 100 ngut na ka Party, ki won wow wanrah 500 ngut chapoh ka TMC.
U Pun Pyrtuh won da ong u wa ha u 2018 da kreh u ya u MLA ka Jowai, u Wailadmiki Shylla wei katni u kyrchaan noh u ya u Andrew Shullai wei da ong u wa heiyatoh wa ka Wyrta wa da mih ha ka 11 tarik da hap sait ya ka neibhah ini toh du nei lehbor donhi wei u T. Bareh uwa na Khanduli da wan batai stat u ha Jowai Constituency. Da ong u wa kam ka hok u kyrchaan ki ya u bru yong ki wei u krehchitom ki neibynta u Andrew wei ymtoh u dooh mynsien wei ym duna u yoh 500 Vote chaneiñ ha kani ka kynti na ka chnong deiwa kyntu leh ya ki paidbah wow kyrchaan ya ka TMC.
U Melin Lyngdoh da ong u wa heiyatoh wa ka Wyrta wa mih ha ka 11 tarik man ko kawa bakla neibhah katkam kiwa yoo boon kiwa psiah na ka NPP cha ka TMC neibhah wa u kyrtong ka Party u Andrew Shullai man u u bru uwa ye wow kreh neibynta ki hok yong ki paidbah.
Ka Lamdeibha Suting da ong ko wa jooh kyrchaan ko ya ka NPP ha u 2018 wei ha kani ka kynti won da mih ko na ka NPP wow kyrchaan ya ka TMC.
Ka Ribha Pyrtuh da ong ko wa ha u 2018 da kyrchaan ko ya u Wailadmiki wei i daw wa mih ko toh wa yoo wa hanla kyrchaan ko ya oo dang ong ki wym em kyrchaan ko ya oo wei ym sñiawbha ko yeini wei ngait skem ko ka Constituency wei ka chnong u kyrchaan ko ya u Andrew Shullai.
Neiliang u Meker Langshiang da ong u wa nadooh wa mih katu ka khubor ha ka 11 tarik ym em u poipyrkhat u wei lai u cha kani ka yalang toh dei bakla neibhah da khut ya oo khlem pyntip ya oo wei ini da pynsñiawsih i ya oo wei kani ka khubor toh kawa bakla wei ym embynta u ha kani ka kaam wei samen dang man u uwa kyrchaan ya u Andrew wei u kreh chitom u neibynta yong oo.
Puræ leh: Yut kiwa kyrchaan TMC cha ka NPP ha Sohmynting
