U President ka Voice of the People Party (VPP), u Ardent Miller Basaiawmoit da kynthah u ya ki MDC wa katni yong ka KHADC waka JHADC, deiwa ong wa man ki kam ki dawai wa da kut por, iwa da wanrah yei jubab kylla na u CEM ka KHADC, u Pyniaid Sing Syiem.
Neiliang u Pyniaid da ong u wa dang lah ki MDC kiwa da kut por kiwa dang krehkaam, kiwa dang chna aiñ, kiwa dang pyrchang wow kreh bar ya kitu ki MLA næ MDC ki wym sñiawthooh yei bor i iktiar yong ki deiwa Resign du chiteiñ por khlem da sñiawthooh ya ka dooh ka dang.
Da ong u wa i eh noh yei kaam deiwa Resign ki MDC ha itu i por da wanrah ko yei dooh nong wa khroo ya ka Council hadooh wa da hap pynlut Rs. 3 klur yow pynman biang ya ka Election chiteiñ samoi.
Hawa kynthah yeiwa klam u President ka VPP, u Pyniaid da ong ham man kam u bru wa pynthap kti, pynkmen ya ki bru uwa pynkhih chnong tangwa hawa kut khlem mih soh uwa bha. Hawa kut ki paidbah daw kylli ki uyi u soh wa kini ki MLA ka VPP da wanrah ki ha ka Constituency wa ha ka jaitbru tangwa u soh yong ki toh wow wanrah yei yasih para bru, heiwa da yoosih ya kiwa mihhkhmat, ya kiwa yahkhmat chnong ka wym pu jooh jia ha kani ka jaitbru.
Da ong u wa ki paidbah ymtoh wow ap ki neibhah kini toh kiwa deiñ dur bula wow pynsñiawbha wei pynthaap kti ya ki bru khlem em iyi iyi.
Discussion about this post