Shillong: U Montri wa pait ya ka chnat puræ puthi ha ka jylla, u Lahkmen Rymbui da ong u wa ka rai yong ka University Grants Commission (UGC) wow pynman ya ka Exam Final Semester hachwa wow kut uni u bnai wa da pynksan da ka kachari wa heh dooh, ka Supreme Court ha ka sngi thohdieñ, neiliang ka sorkar jylla daw hap ko wow ya pynbait chwa wa ki bor pynlai ka North Eastern Hills University (NEHU).
Da ong u wa ka sorkar emkaam ko wow tip ya i thmu yong ka NEHU hadien wa ka Supreme Court da pynksan ko yaka UGC wow pynman ya ka Exam, deiwa pynsñiaw leh wa ya katni ym pu ye wow ong iyi iyi hajrong ka Exam kat wym pu yoh u yaklam wa ki bor pynlai ka NEHU, tangwa da kyntu won u ya waroh kiwa lai puræ wow pynkhreh neibynta ka Exam kawa ye wow man ha iwon iwon i por neibhah katkam i rai yong ka Supreme Court, da klam che wa ym ye wow pynkup Degree ya kiwa lai puræ khlem da yaleh Exam.
Da ong u wa katkam i rai yong ka Supreme Court, da elaad leh ya ka sorkar jylla wow thoh cha ka UGC neibynta wow kyrriah chwa ya ka tarik, lada ka jylla ym pu yoo biang ko wow pynman yaka Exam ha kam kini ki por neidaw ka khlam COVID-19.
Hawa kylli, da ong u wa ka sorkar jylla ya katni ym pu chim ko yaka rai wow thoh cha ka UGC, neibhah hadooh kattæ ym pu yoh wow yaklam ya kani ka kaam wa kiwa pynlai ka NEHU.