Jowai: Ka Fit India Youth Club toh kawi na ki bynta yong ka Fit India Movement wa da pynbna da u montri khynnah ka sorkar India u Kiren Rijiju ha ka 15 tarik Naisaphra kawa man ka sngi lehkmen yei yoh laitlooid wa 74 ka ri heiwa ka thong yong ka toh wow pynpsiah hei pyrkhat pyrdaiñ ki khon khynroo ka ri yow man ki kitæ ki bru kiwa tip wa sñiawthooh u kheiñkor yei pran samen dei wow pynwyrngia ha ki kaam yalehke Sports wa boonjait boon rukom.
Kamtæ ka Meghalaya Bharat Scouts & Guides, West Jaiñtia Hills kam chibynta i yaksohkti yong i pynman ya ka Fit India Youth Club, ha kani ka 29 tarik u Naisaphra da pynman ko ya ka Yoga Programme heiwa da yachimbynta da ki khynnah Rangers yong ka Jowai Open Unit wa ki khynnah Guides.
Ha ka yalang yahkhmat u Adiam u Bthuh, Jt. District Secretary MBS&G, West Jaintia Hills da e u ki kyntien pdiang burom katwa u Kamnipaia Challam, Yoga Instructor Art of Living West Jaiñtia Hills da e u i klam i batai chaphang ka yurim yong ka Yoga wei da khana u leh wa ka Yoga toh kawi na ki rukom saiñdur yei long i man yong i ki bru wa kynthup i chait I khiah hei doh i pran, i pyrkhat pyrdaiñ wa ka spah mynsien.
Chooh chooh kyrsu kyntu u leh ya kiwa yachimbynta wow em ki itae i mynsien yaichah hawa leh Yoga wei wow pynmlien ki u leh tikna ha yung khnang yow chem wei sñiawthooh ki yei myntoi wei kordor yong i leh Yoga.