U MLA ka Nongkrem, u Ardent Miller Basaiawmoit da ong u wa i kaam khayi drugs dang yoo chyrkhei bar yei khayi mooyong ha ka jylla wei da yoo maa leh yei ku kiwa yoh HIV.
Hawa klam hapoh ka yung dorbar hajrong kani ka phang ynne ka sngi, u Ardent da ong u wa yoo chyrkhei i roi i drugs ha ka jylla wei man i iwa maa wei lada ym leh iyi iyi yow kdoh u khoom yeini daw mih sa ki seiñ wa tip ki Drug Cartel kiwa man leh kam ki seiñ kieñ suloi.
Da ong u leh wa da yoomaa yei mih khubor weiwa emkti wow pynlai drugs toh iwa emkti da ki pulit wei toh u takit yeini.
U Ardent da ong u wa i drugs da pynjæd i ya uwa dih, ka yung ka sem wa ka imlang sahlang. Wei katkam ka Report da em kamwa 3 lak ngut kiwa dih drugs hapoh ka jylla kawa em 36 lak ngut kiwa chong chnong.
Hawa pynsñiaw yeiwa da pyrchang lyngba ka DREAM, da ong u wym pu em man ko kawa biang hanla da lai kattu katni snem neibhah ym pu yoo ya u soh heiwa kiwa pynemkaam dang roi chooh chooh ki wei ki thaw lai phah sumaar ya kiwa da chah kdoh chah khoom hei drugs man ki kiwa syad dor iwa da booh hei eh ya ki manyung mansem.
Chooh chooh da ong u wa deiwa pynman ya ki tamasa deiwa dai kiad laitlan da pynyohlaad ko leh yei pynemkaam drugs.
Heijooh i por da kyntu ya ka sorkar wow chim ko ki laad ki luti wow pynsangeh leh yei em kiwa yoh HIV iwa dapoi hei dak wa maa hapoh ka jylla deiwa boon kiwa yoh ya uni u khñiang.
Da ong u wa heithaw wow sikai ya ki bru wow pynemkaam Condom, da toh por wow hikai ya ki khynroo khyllood wym ya thiah ya dem khlem da Test chwa ya u khñiang HIV, khnang wow lait na uni u khñiang.
Da ong u leh wa da emkaam wow pynpsiah hei pyrkhat pyrdaiñ ki khynnah skur khnang wow man ki kiwa syndong wei sñiawthooh neibynta ka mynried yong ki wei yow lait ki wow man kam ki langknia.
Discussion about this post