U Sadon Blah uwa man u ksiang wa mihkhmat yaka Hynniewtrep National Liberation Council (HNLC) hei yaklam yasuk, da khana u wa wot u ksiang yong ka sorkar pyrdi, u AK Mishra da ong u wa ki kaam wa da leh da ka HNLC ymtoh kiwa chyrkhei hadooh kattæ kattæ.
Hawa klam wa ki laad pathai khubor, u Sadon da ong u wa kamwa man kattæ em du 3 tylli ki mukotduma pyrchah ya kiwa yahkhmat ka HNLC, wei kiwa booon toh ki mukotduma kiwa yatoh wa i tympdung Bomb, wei pynrap u wa u AK Mishra da ong u wym em ki kaam pyrcha aiñ ka HNLC kiwa chyrkhei hadooh kat deitæ, iwa mut wa ka luti toh u em. Da ong u wa heipor wa yakhih ki seiñbhalang dang rap chyrkhei bar ya iwa da leh da ka HNLC.
Heijooh i por, u Sadon da ong u wa hadooh katni ka HNLC da pynbna ko wow mih noh nei yaklam yasuk tangwa ym em won ong ki wa da pyndam ki ya ki ksiang yong ini i yaklam, iwa mut wa ka sorkar toh u sñiawthooh ko wa u chabi neibynta wow yaklam yasuk dang em lada ka sorkar ap ko yei dawa yong ka seiñ.
Ha iwi won i liang, u Sadon uwa man leh u President ka Hynniewtrep National Youth Front (HNYF), da ong u wa ka seiñ HNYF da beiñ joor ko ya ka sorkar wa kheiñ stiñ ko wow pynmankaam yeini i klam yasuk haka wat wa ar waka HNLC kawa da wan hadooh tyngkong yow tyrwa cha ka sorkar neibynta i yasuk, wei pynrap u leh wa ka HNYF da kyntu ko ya ka sorkar wow ap ko yei dawa ka HNLC khnang wa i yaklam yasuk u pteiñ biang i.
Discussion about this post