Shillong: U Chief Executive Member (CEM) wa thymme ka KHADC, u Hispreaching Son Shylla da pyntip u wa ka Executive Committee wa thymme u booddien ko ya i pynemkaam ya ka poisa T. 28 klur khamtam hadien wa u CEM warim da kam u wa ya katai ka poisa da pynemkaam neibynta ka KHADC.
Hawa klam wa kiwa pathai khubor u CEM da ong u wa ka EC daw pait bniah ko wow pynbait ya i pynkrehkaam ya ka poisa neibhah kamwa tip u wa ya ki kaam wa da poi T. 1 Klur da tymmoh khyndaw donhi.
U Shylla da ong u, “Ya i paan bhah wa 20% da u CEM warim u Pynshngain N Syiem u pyndam noh chisyndon neibhah ini i leh u da pynsih ko ya waroh ki kaam.”
Da pyntip wa da paan ya ka bui na u Joint Secretary ka Council wow yoh yutip katwon tylli ki kaam wa da pynkreh da ka KHADC na ka T. 28 klur, wei da pynrap wa katni dang yang ya ka bui khnang wow booddien ya kani ka kaam.
U Shylla da pyntip u wa neiliang yong oo wa nadooh ki por u CEM warim, oo dadep ong wa ym em yumut wow pynkylla ya katai ka poisa cha i pynkrehkaam neibynta ka Council, tangwa toh u saam cha ki MDC neibynta wow pynemkaam neibynta ki emkkaam ki paidbah ha ki Constituency.
Da ong u leh wa i kaam yong u CEM CEM warim u Pynshngaiñ N Syiem wa i pynslem yong ki MDC wow e ya ki Utilisation Certificate (UC) toh i klam wa bakla, neibhah ki MDC ki da pynkrehkaam lut ki ya ka poisa.
Katkam i ong u Shylla, neiliang u Joint Secretary ka Council da pynbiang lut u ya waroh ki kot ki sla, tangwa ki Bill da sah lut ko ha ka miej yong u CEM wei ini da pynsuki chanam u Pynshngain.
Hawa jubab lada ka EC wa thymme em ko i thmu wow pyndam noh chwa ya ki Tender wa da khut da ka Council, neiliang u CEM da ong u wa hadooh katni ym pu tip u wa hadooh katwon tylli da khut Tender na katai ka T.28 klur wei daw yang u ya ka bui wow tip bniah.
Discussion about this post