Ka Executive Committee yong ka Khasi Hills Autonomous District Council (KHADC) da rai ko wow chna da ka Town Committee ka wow pait ya i khooid i jngiar ha ki chnong ki thaw kiwa haap hapoh sor Shillong.
U Chief Executive Member ka KHADC, u Titosstarwell Chyne da pyntip u wa ka Executive Committee da yatai sani bha ko hajrong ka hukum wa da pynmih da ka Meghalaya High Court kawa yatoh wa i tngit hapoh ka sor Shillong kiwa haap hapoh u pood u ang ka KHADC, wei ka sñiaw ko wow sdang noh da ki Town Committee neibynta wow pait ya i khooid i suba.
U CEM da pyntip u leh wa ka Council daw thoh ko cha ka sorkar neibhah ka sorkar leh da yoh ko yei yarap na ka sorkar pyrdi ya ka Scheme neibynta wow pynkhooid ya ka wah Umkhrah, wei da pyntip u wa yei thoh cha ka sorkar toh wow paan pynche neibhah da kdaw wa ka District Council leh ka em ko i bynta ha ka Scheme yong ka sorkar pyrdi.
Ha iwi i liang u Titos da pyntip u wa ka Council da rai ko leh wow pynsmat yei pynkrehkaam ya ka ‘Tied Scheme’ kawa yatoh wa ka Water & Sanitation neibynta i myntoi ha ki chnong ki thaw.
Katkam wa pyntip u Chief Executive Member, da ong wa ka KHADC da yoh pdiang ko ya kani ka Scheme ha ka First Instalment kawa man T. 20 klur wei da phah ya ki MDC wow phah tyrwa ya ki kreh (Proposal) wa man katkam ki kyndon wa da booh.
