Ka lehniam thang hawa em wa yap hapyrdi kiwa ngait niam Hindu hapoh Jowai wa kamjooh ka West Jaiñtia Hills toh iwa da pyndep bait ha u Loom Poh Sabar wa em hapoh u pood ka chnong Khliehtyrchi, West Jaiñtia Hills wei ya ini i thaw da pynemkaam da ki phaw snem kattu.
Katkam wa man hadooh kini ki sngi ki bru wa ngait niam Hindu kiwa em hapoh Jowai wa ki talawiar ki chnong yong ka pyndep ki ya ka niam thang deiwa chna ya ka khnap (thaw thang) deiwa pynemkaam bait chiboon ki dieñ, wei ini da wanrah i yei kwah hapyrdi kiwa boon wow chna noh da ka Khnap Thang-bru neibynta yong ki.
Hajrong ini waroh, ynne ka sngi neiliang u MLA ka Jowai, u Wailadmiki Shylla da pynbna u yei thmu ka sorkar wow chna noh ya i thaw thang-bru wa kyrpang ya kiwa da khlaad namo ka Eco Friendly Crematorium neibynta ki bru wa ngait niam Hindu.
Ya ini da khana u Wailadmiki heipor wa lai pait u ya ka lehniam Durga Puja chirup wa u Dolloi ka Elaka Jowai, u Puramon Kynjing, u Chairman ka Jowai Municipal Board u Lasoo D Lakiang, wa kiwi kiwi.
Heijooh i por neiliang u Wailadmiki da pyntip u wa kani ka Scheme da man ko kawa lai chaphrang wei yooluti u leh wa i kreh leh u sdang noh i.
