U Montri wa pait ya ka chnat Puræ Puthi ha ka jylla, u Lahkmen Rymbui da ong u wa ka sorkar da dep klam che ko wa nadooh wa sdang ya kiwa sikai wa ka Teachers Eligibility Test (TET) toh kawa emkaam wei da phah pynkhreh leh ya waroh kiwa sikai.
Da ong u wa katkam ki kyndon yong ka Right To Education Act, 2019 da klam che ya ki kyrdan wa emkaam kiwa sikai u em neibynta wow yoh u chah thung kreh. Da ong u wa hadien wa em boon ki wym pu pyndep ya ki kyrdan, ka sorkar da e laad ko boonsien wow yakhun ya ki Exam wei la kammon kammon toh u yoh 45% chaneiñ ha ka Class XII.
Da khana u leh wa ka High Court ha u snem 2020 da pynmih ko yei rai wa ym ye de wow pynskem bait ya kiwa sikai Contract wei ya ini leh da pynsñiawthooh cha kiwa sikai ha ka yachem wa da man ynne ka sngi.
Ha iwi won i liang da ong u wa ka sorkar daw e laad ko sa chisien ya kiwa da heh rta kiwa da Pass ya ka Meghalaya Teachers Eligibility Test (MTET) wow yakhun ya ki Interview psiah kaam kam kiwa sikai.
Hajrong i pynman ya ka Exam MTET ha u snem 2019, u Rymbui da ong u wa hanla da wanrah ya ka TET nadooh u snem 2010, tangwa da pynman ya ka ha u 2019 toh neidaw wa ka sorkar ym kwah ko wow pynkut kamtu hi-eh ya kiwa sikai Contract wei wow e laad ya ki wow pyndep ya ki kyrdan puræ katkam ki kyndon ka National Council for Teachers Education (NCTE).
