Daw em ar ngut ki MLA ka UDP kiwa daw psiah cha kawi won ka seiñ: Paul Lyngdoh

Ka khubor wa em hadooh 9 ngut ki MLA ka United Democratic Party (UDP) ki wow phet noh cha ka BJP ye ko wow man iwa sakhiat wei kani toh hadien da mih nei wym che wa i wym hun ki MLA ha ka yalang ka GEC yong ka UDP.

Hawa yaklam wa u Paul Lyngdoh uwa waroh da suba ki kam uwa yahkhmat kini ki 9 ngut, da ong wa waroh ki MLA da lynga wei da sñiaw doom i pyrkhat wei ini toh hawa ym yoo yei che iwa da pynman ya kiwi ki MLA wow pait da kiwi ki luti.

Da ong u i wym hun ki MLA toh hei yachem ka General Executive Council (GEC) heiwa waroh kiwa klam ha ka yalang da klam ki dewa diaw chaphang i long i man yong ka UDP, heiwa da pynsñiaw leh yei wym yoo ki ya ki dak ki chin yei heh i san ka Party. Da ong u wa toh na ini i daw wa mih ki khubor kamwa da mih ha kini ki kajiak sngi.

Da khana u wa ha ka yalang da paan leh ya ka Report krehkaam yong ki ar ngut ki Montri ka UDP hadien wa da pynthymme ya ki Montri sorkar MDA-II.

Hawa kylli lada oo embyntalang u næ ym em ha kani ka liang ka wow psiah cha ka BJP, u Paul da ong u wa i lai chakhmat i kaam ym ye wow ong iyi iyi leh neibhah ha i lai Delhi wa Kolkata ym embyntalang u. Da ong u wa ha ki ar snem chiteiñ wa man u kam u Montri sorkar ym em ki dak wa kaad wa piah ka UDP kawa mih cha baar, tangwa kattæ ym pu em chi snem leh wa kylliang ya ki Montri sorkar da mih kat kani ka khubor wa da tip paidbah, wei daw em sa ar ngut ki wow psiah cha kawi won ka seiñ.

Related posts

Heipor wa e sikai pynemkaam JCB pynchna syndon ya ka luti yongrim wa jooh lai ki syiem na Jaiñtiapur cha Nartiang

November 6, 2026

Yoh ki ar tylli ki thaw sumaar ka West Jaiñtia Hills yei tipmit na ka National Quality Assurance Standards

November 6, 2026

Hawa kylli chooh chooh, da kyntait u wa oo toh uwa yahkhmat ki 9 ngut, wei da ong u wa ya kattæ kamwa yoo toh u Lahkmen Rymbui uwa yahkhmat ya kini, wei kayi kawa dwa mih ha ki tayaaw wow ym pu ye wow ong, wei da pynrap u wa ka chitayaaw toh ka por wa slem bha ha ka Politics.

Hawa kylli mynnu daw psiah ki cha ka BJP, u Paul da ong u wym em u hawa yachem wa ki heh BJP ha Delhi wa Kolkata, deiwa ong wa la kammon kammon leh ha kawon kawon ka rukom ym tip u neibhah wa khlem lai u wa ki ha itai i yachem.

U Paul da ong u wa iyi iyi i wow jia ya ka UDP daw yaklam wei daw che kdar bha wei da pynrap u wa kawi kawa da che toh yeiwa hiar ka UDP, i ku yong ka VPP wa i ye wow ku ka BJP lada psiah ki 9 ngut ki MLA ka UDP toh kiyi kiwi kiwa hap wow pait bniah wa ileh jia ini waroh.