U Montri wa pait ya ka chnat puræ puthi ka jylla, u Lahkmen Rymbui da pynsñiaw u wa em chiboon i eh hajrong i thmu wow pynkrehkaam noh da ki School Bus wow rap pynsuk ya ki khynnah skur kamjooh wow pynkyllooid ya ki thaw sor.
U Montri Rangbah ka jylla, u Conrad Kongal Sangma hawa wanrah ya ka mang tangka hapoh ka yungdorbar ha u bnai wa dadep, da pynsñiaw u wa ka sorkar daw pynkrehkaam noh ko ya 100 tylli ki Mini Bus neibynta ki khynnah skur, wei ini i thmu ka sorkar toh wow pynkyllooid ya ka sor nei sahkut kari.
Hawa kylli, u Lahkmen da ong u wa eh toh cheiwon u booh ya kitæ ki Bus neibhah ym em thaw pynyieñ, kammon leh wow booh ya ki thaw wow ku wow hiar ki khynnah, wei iwi toh wa ki Bus ymye ki wow psiah cha ki sarok chnong.
Da ong u wa ini i thmu u Conrad toh iwa bha tam, tangwa da pynrap u wa dang emkaam wow pyrkhat lada pynkrehkaam ya kini waroh daw wanrah ko ya i suk wa i kyllooid ya ki sarok, ym wow pynkhnñia ya ki.
