Ka National People’s Youth Front (NPYF) ha ka 18 tarik uni u bnai da pynkup burom ko ya ki 29 ngut ki khon khynroo khyllood ka 2-Jowai Constituency kiwa da lehbha ha ka Result SSLC wa HSSLC yong uni u snem 2026, wei ya kani ka pynkup burom da tip kam ka 2nd Wailadmiki Shylla Felicitation Ceremony.
Ya kani ka yalang pynkup burom da pynman ha Auditorium ka District Library Jowai heiwa u Wailadmiki Shylla uwa man kam u Montri sorkar kamjooh u MLA ka Jowai Constituency, da man u kam u kongsan katwa u Octomewot Lamin Nominated MDC ka JHADC da man u kam u symbood kongsan deiwa emlang kiwi kiwi de kiwa chah khut sñiawbha.
U Wailadmiki Shylla hawa klam ha kani ka sngi ong u hanla ini i pynkup burom man iwa khian leh tangwa man i wow pynyoh mynsien ya ki khynroo khyllood wa lai puræ deiwa yooluti u man ki kam ki khloor ka Jowai Constituency ha ki bynta waphær waphær wei yooluti u leh neini chakhmat ymtoh de u hiar i kreh chitom ki neiwa da yoh tangwa u nang ku na ki snem cha ki snem.
Ong u leh wa da boon snem ym em de wa Pass UPSC napoh ka jylla Meghalaya kamtæ kyntu u wa napyrdi kiwa pynkup burom ha kani ka sngi u em kiwa daw man IAS, IPS wa kiwi won ki kyrdan wa hakhlieh.
Kyntu leh ya ki manbei manpa u e laad ki ya ki khon u jied ki ya iwon iwon wa kwah ki khon ki.
Hawa pynkynmoo u yei kaam wa da leh u hapoh ka Jowai Constituency neibynta i myntoi ki paidbah, pyntip haroh u wa ka Jowai Constituency man ko kawa embhah tam neibhah dang ini wa dep ha ka Meeting wa u Montri Rangbah ka jylla da rai ki wow pynheh ya ki thaw sumaar sorkar wa kynthup ya ka Jowai Civil Hospital wa em ha Ialong wa ka Maternity & Child Health Hospital wa em ha Panaliar Jowai khnang yow ye chooh chooh u pynboon ki laad e sumaar yow lait u phah ya kiwa kjut chitom cha kiwi won ki thaw sumaar.
Ngait skem u leh wa neini chakhmat u nang kreh chitom chooh chooh u wa kammon u pynku ya ka Jowai constituency wa kamjooh ka Ri-loom Jaiñtia waroh kawi.
U Octomewot Lamin won da kyntu u ya ki khon khynroo khyllood wow sai wow pynyoo ki yei sap wa em khlem iwon iwon i sarom, khnang yow poi leh cha ka thong wa mut wa mang.
Heijooh i por leh ong u i stat i tip man iwa kordor heiwa manda yoh yei stat i tip, i chemphang wan i hadien. Weiwa kani ka sngi wa yoh burom ki leh man ka wow pynsah kynmoo ya ki ha ki sngi ki por wa daw wan.
Ha ka yalang wa pynlai da ka Daphishisha Sukhlaiñ, da yoh i klam pdiang na u Same Laloo, President NPYF 2-Jowai Block, i klam na u Eladmiki Suting kam u bru chemphang kani ka sngi, i ngooh Blai na ka Nerila Laloo, katwa i kyntien khublei na u Tremiki Sutnga, Secretary NPYF 2-Jowai Block.
Discussion about this post