Shillong: U President ka United Democratic Party (UDP) uwa man leh u chongknor ka yung dorbar chna aiñ ka jylla, u Dr. Donkupar Roy da phla u wa u Pynshngain N Syiem da lai yachem u ya ka UDP wow paan kyrchaan na ka neibynta wow mih madan u wow yakhun ya ka Election chiteiñ samoi na Ranikor Constituency.
U Dr. Don da ong u wa ka Party daw pynieñ bait ko ya u kyrtong ha kani ka Constituency uwa wan wa ar ha kani ka Election wa dang dep, u Pius Marwein neibhah ym em yalok ko wa kiwi won ki party lait noh du wa ka HSPDP.
Da pyntip u wa hadooh katni ympu em yaklam chaphang i kyrchaan ya u kyrtong wa ngaitlang ka sorkar MDA kamwa da leh ha ki ar tylli ki Election Chiteiñ samoi ha Williamnagar wa Ampati, lait noh wa ka HSPDP kawa da em chwa i yalok nadooh u snem wa dadep.
Ha iwi i liang uwa yahkhmat ka UDP da ong u wa i e ya ka Civil Sub Division cha Ranikor ymtoh da ka party NPP, tangwa yeini da leh da ka sorkar hadien wa da bichaar bniah yeiwa emkaam ka thaiñ.
Da ong u wa katkam i yoo yong oo, ka Sohra wa ka Mairang kiwa da em ya ki Civil Sub Division kiwa da rim bha da toh u pynku kyrdan noh cha ki District.
Hawa yoh wow yaklam wa u President ka Hills State Democratic Party HSPDP), u KP Pangniang da ong u wa ka Party kwah ko wa ki seiñ ri-loom wow yaphyllu yumut lang ki wow kynthup ya ka PDF wa kiwi.
Da ong u wa emkaam wa ki seiñ ri-loom wow ya sñiawthooh yumut ki wow man leh ka dak wow pynkhlan biang ya ki ha ka jylla.
Kamwa mih hadooh katni ka UDP wa ka PDF daw sai kyrtong ki ha ka Election chiteiñ samoi ha Ranikor, tangwa neiliang uwa yahkhmat ka HSPDP da ban bait u wa ka party ym pynyieñ kyrtong ko.
Ha iwi i liang u Pangniang da ong u wa i pynyieñ kyrtong ki seiñ ri-loom ha Ranikor toh ha man ki Election, wei ym phylla lada pynyieñ kyrtong ha kani ka kynti leh hanlada em ha ka sorkar synrop MDA wa yahkhmat da ka NPP, wei da kam u leh wa i yakhun pyrchah ha ka Election ym ktah ko ya ka sorkar.
Discussion about this post