Shillong: U Executive Member (EM) wa pait ya ka chnat khayi pateiñ (Trade) ha Khasi Hills Autonomous District Council (KHADC), u Paul Lyngdoh da ong u wa ka chnat ym e ko ya kawon kawon ka Trading Licence næ wow pynthymme ya kiwa da em chwa cha ki baar jylla katwa ympu ye wow wanrah ya ki kyndon wow kdoh, deiwa pynku leh ya ka bai register khnang wow kdoh ya i wan khayi kiwa na baar hapoh u pood u ang ka council.
Hawa yaklam wa kiwa pathai khubor hadien ka yalang wa ki sahep ka Council, u Paul da ong u wa ka Council kwah ko wow pynkhlan ya ka aiñ Trading by Non Tribal Act neibynta wow pynchlur ya ki tre chnong ha ka khayi pateiñ wei kamjooh wow khoom wow kdoh ya kiwa wan na baar.
Da ong u leh wa ka aiñ klam che ko wa lada em ki tre chnong kiwa ye wow leh ya kawon kawon ka kaam, ymtoh wow e license cha ki bru wa na baar.
Chooh chooh da ong u wa ka chnat da rai ko wow pynku ya ka ka dor bai pynthymme ya ki licence kamjooh leh kiwa thymme neibhah kamwa man katni duna ware ko wei ym ye ko wow khanglaad ya kiwa na baar wow wan khayi kawa da pynchlur pathan ya kiwa na baar.
Da pyntip u wa ha ka yalang da rai leh wow ekti ha ka Committee wow khlieh da u Deputy Secretary hadooh katwon wow pynku ya ka bai license, nadooh kiwa dang thyme namo kiwa daw pynthymme, wei ya ka yumut wa pachat daw rah u Secretary cha u EM u wow rah won ya ka cha ka Executive Committee wow yoh yei mynjur.
Discussion about this post