Ka Voice of the People Party (VPP) daw pynskem noh ko ya ka chap yong u ‘Prah’ wow man ka chap wa pura neibynta yong ka VPP, hadien wa ka Election Commission of India da tipmit ko ya ka Party kam kawi na ki seiñ saiñpyrthei (State Party) hapoh ka jylla Meghalaya.
Neiliang uwa e ktien ka Voice of the People Party (VPP), u Dr. Batskhem Myrboh da pynsñiaw u yei sñiawngooh wei e khublei ya ki paidbah kiwa da e yei kyrchaan ya ka Party ha ka Election wa dang dep wot, iwa da pynman ya ka Election Commission of India wow tipmit noh ya ka VPP kam kawi na ki State Party ka jylla.
Hawa kylli, neiliang uwa yahkhmat ka VPP da ong u wa i pdiang ki paidbah ya ka VPP da nang ku man-ka-sngi khamtam hadien yong ka Election, wei da ong u wa ka Party daw pyrchaang ko wow pynyaar ya ki chnat cha kiwi ki bynta yong ka jylla wa kynthup cha Garo Hills.
Da ong u wa kamwa man ha ka Election wa da dep, ka VPP da sai ko boon ki kyrtong du ha East Khasi Hills, tangwa ka Party ngait skem ko wa ye u pynyieñ ya ki kyrtong ha waroh ki Constituency neibynta ka Election cha KHADC wa JHADC kawa daw man ha u snem wow wan.
Hawa yatoh wa ka Garo Hills, u Dr. Myrboh da ong u wa kiwa yahkhmat daw pyrchang ki wow pynsoohthied ya ka Party ha katai ka thaaiñ neibhah nadooh wa sdang kiwa yahkhmat da em ki i thmu wow pynman ya ka VPP ka wow em ha waroh ki bynta yong ka jylla Meghalaya.
Hawa yatoh wa ka Election MP cha Lok Sabha kawa daw man ha u snem wow wan, da ong u wa ka VPP u pyntikna ko wa ka Party daw sai bait ko ya u kyrtong, tangwa ya uwon wow pynyieñ kam u kyrtong daw pyntip da u President ka Party ha i por wa biang.
Puræ leh: Da tipmit ya ka VPP kam ka State Party, dooh ka AITC yei man National Party
