15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Daw rah ka HSPDP hakhmat u Conrad yei eh ka chnat Bordiñ

Advertisement ad1

Ka Hill State People’s Democratic Party (HSPDP) daw rah ko yei eh wa yatoh wa ka chnat Bordiñ hakhmat u Montri Rangbah ka jylla, u Conrad Kongal Sangma, wei ya kani ka phang ka Party daw yaklam biang ko leh ha ka yalang ka wow man ha ka 7 tarik uni u bnai.

Ka HSPDP toh kawa ya krehlang wa ka UDP ha ka Regional Democratic Alliance (RDA), tangwa neiliang u Chief Organiser ka HSPDP uwa man leh u MLA na Sohïong, u Samlin Malngiang da ong u wa ha ka RDA ym pu em i yaklam wow dawa pyndam noh ya u James PK Sangma na ka chnat Bordiñ wei ya ka chithi wa da phah cha u Montri Rangbah leh toh du da ka UDP. Da ong u wa hanla i thoh iwa da soi du da u General Secretary ka UDP, tangwa neiliang ka Party da chimkhia ko hajrong i eh wa da mih na ka chnat Bordiñ.

Ha iwi won i liang u Montri warim ka sorkar jylla, da pynsñiaw u yei sñiawkhia hajrong i chah pyndooh bordiñ wa khak khak næ ka Load Shedding neibhah wa ktah palat ko ha waroh ki liang, kam ya kiwa dang lai puræ deilang waki paidbah, heiwa da pynrap wa kam kiwa yahkhmat, ki sñiaw ki wa toh u klam chwa hapoh ka sorkar wei lada ym mihsoh, ka Party daw chim won ko da kiwi ki rai.

U Samlin da pyntip u wa neiliang ka Party da dep ko wow pynsñiaw yei emkaam wow khut smat leh yei yachem ka MDA Coordination Committee hachwa u mih i wym sñiawsuk, wei khnang wow lait na i kynrum kynram, u Montri Rangbah uwa man leh u Chairman ka MDA toh u khut smat u ya ka yalang hadien ka Election MDC ha GHADC.

Share this:
Previous

Da pynman yaka lympung wa nyngkong ki khon khynroo ka Seng Khasi Seiñ Raij (Sengkhihlang)

Next

4 ngut kiwa dang yoh wa 7 ngut kiwa dang chait na u COVID-19 ha Meghalaya