Hadien wa khut sñiawbha u montri rangbah ka Meghalaya, u Conrad K Sangma ya u Speaker ka Lok Sabha u Om Birla wow wan cha Shillong, kamtæ da pdiang u ya ini wei daw wan u cha Shillong haka 25 wa 26 tarik uni u bnai heiwa daw klam u hakhmat ki MLA ka jylla ha Meghalaya Legislative Assembly Building, Rilbong wei hadien ini daw lai u cha i thaw wa dang chna thymme yaka Meghalaya Legislative Assembly Building ha Mawdiangdiang.
Haka sngi wa bood daw wai u leh yaka ‘Outreach and Familiarization Programme for Local Bodies of the State of Meghalaya and other North Eastern States’ kawa daw pynman ha State Convention Centre, Pinewood Hotel, Shillong.
Ya kani ka Programme da leh neidaw wa kiwa boon ki thaaiñ North-East toh kiwa em hapoh ka Fifth wa Sixth Schedule ka riti synchaar ka ri. Ki le tylli ki jylla kitæ ka Meghalaya, Mizoram wa Nagaland toh kiwa da lait naka 73rd Amendment wei da em ki hapoh ka Sixth Schedule.
Ka The Panchayats (Extension to the Schedule Areas) Act, 1996 toh kawa da em hapoh ka 73rd Amendment neibynta ki thaw wa haap hapoh ka Fifth Schedule. Katwa kiwa ym em hapoh ki jylla Sixth Schedule ha North-East hapoh ka 73rd wa 74th Amendments (Panchayati Raj Institutions) toh kawa da pynkrehkaam ha Assam (lait noh ha Karbi Anglong Autonomous District Council wa North Cachar Hills Autonomous District Council), Manipur, Tripura (lait noh ki thaw wa em ki jaitbru ri-loom Tripura Tribal Areas Autonomous District Council), Arunachal Pradesh wa Sikkim.
