Hadien wa mih i awri awra hapyrdi kiwa kitkaam ka seiñ khynroo ka BJP hapoh jylla ya kawa tip kam ka Bharatiya Janata Yuva Morcha (BJYM) Meghalaya Pradesh lyngba u Vice President yong ka u Wallambok Khongwir wow yakhih wow dawa pynkylla ya kiwa kitkaam ka seiñ ha ka jylla, neiliang u President ka BJYM, u Krison Langstang da pynche u ynnin hajrong ini waroh.
Neiliang u Khongwir won ynne ka sngi da ong u wa kiwa kitkaam ka Party na ki Constituency wa ki chnat kiwa em hapoh ka Ri-Bhoi da kyrchaan ki yei dawa wow pynthymme namo wow kylla noh ya kiwa kitkaam ka Party nadooh u Party President.
Kini kiwa kitkaam ka Party na Ri-Bhoi da pynbaad ki leh wa u President ka Party leh u kam u liang pyrchah, ka Congress neibhah wa ki heh Congress da kyrchaan ki yei klam yong oo.
Kini ki heh ka BJP na Ri-bhoi da rai ki leh wow ujor cha ki khlieh ka Party ha Delhi chirup wa ki sabut wa u Mawrie (President ka BJP) kyrchaan u ya ka Congress wei ya ka yutip wa bniah daw khana ha u Amit Shah u wow wan cha ka jylla ha u Wisu (March) 2021.
Ya kani ka kot da soi da uwa kitkaam ka Umsning Mandal, Jirang Mandal, Mawhati Mandal, Nongpoh Mandal, Umroi Mandal, u District President ka Ri-Bhoi District wa u General Secretary ka State Kisan Morcha.
