I ku dor biang i Petrol wa Diesel da sakhi ha waroh kawi ka ri India, khamtam ha ki kajiak sngi wa dadep, iwa da sdang nadooh ka 22 tarik u Wisu kamjooh ha nongbah Shillong. Chwa ini, i dor i Petrol man i T. 94.16 chi liter, katwa i Diesel won T. 80.75 chi liter.
Hadooh ynne ka sngi ka 31 tarik u Wisu i dor i Petrol ha Shillong da ku cha ka T. 100.32 chi liter, katwa i Diesel won T. 86.43 chi liter.
Hawa kylli ya ki laad wa ka sorkar ye ko wow leh wow pynduna yei ku smat i phñiang, u Symbood Montri Rangbah ka jylla, u Prestone Tynsong da ong u wa i ku dor i phñiang kari (Petrol/Diesel) ymtoh du ha ka jylla næ ka ri India, tangwa i ku dor man i ha waroh kawi ka pyrthai neidaw wa em ka thma Russia wa Ukraine.
Da ong u wa ka sorkar jylla dang emkaam ko wow pyrkhat kammon wow lait nei ku dor, deiwa pynrap wa ka sorkar jylla hap yaklam ko wa ka chnat wa pait ya ka muna tangka ka sorkar pyrdi wei wot hadooh u Montri Rangbahdooh ka ri wa kammon wow pyndooh ya i eh i khoo.
