U Symbood Montri Rangbah ka jylla, u Prestone Tynsong da beiñ u ya u MLA ka All India Trinamool Congress (AITC), u Zenith Sangma, deiwa ong wa ymtoh u leh Politics u heiyatoh wa i pynbait ya u pood u ang wa ka jylla Assam.
U Zenith uwa man leh u MLA ka Liang Pyrchah da lai yoohkjat u ha ka chnong Maikhuli kawa em ha Ri-Bhoi District, heiwa da pynbaad u wa ka sorkar ym em ap næ klam ko wa ki paidbah hachwa wow soi ya ka soskular wa ka Assam neibhah ki paidbah kani ka thaw ym kwah ki wow em ha Assam wei da pyrchah leh ya i dooh ya ki thaw yong ki ha ini i pynbait ya u pood.
Hawa klam ynne ka sngi, u Prestone uwa man leh u Chairman ka Regional Committee na Ri-Bhoi, da ong u wa i pynbaad u Zenith da man iwa bakla, neibhah neiliang ka Committee da phyllu yumut ko wa ki khlieh synchaar wa kamjooh leh wa ki waheh chnong ka thaaiñ, heiwa da yoh leh ya ki kot ki sla na kiwa yahkhmat ka chnong.
Da ong u wa u Zenith Sangma ymtip u iyi iyi hajrong ini, wei ymtoh iwa bha wow leh Politics neibhah wa yoo kynchiñ.
Da ong chooh chooh u wa ym em wa nood wow tba ya ini i kaam (Issue), lait na ka sorkar MDA kawa chimkhia wow pynlait nei kynaad wa i sñiawthooh bakla.
