Shillong: Ka dorbar chnong Barato ryngkat wa u MDC ka Barato-Mukroh, u Aiborlang Shadap chirup wei kyrchaan ka Khasi Student Union (KSU) na Jaiñtia Hills wa ka Latympang Welfare Organization (LWO) ynnin ka sngi da dawa ki na u montri ka kaam pohyung ka jylla, u James K Sangma wow booh noh da ka Police Outpost ha ka chnong Barato.
Hawa yaklam wa kiwa pathai khubor hadien i yachem wa u James, u Aiborlang da ong u wa ka thaaiñ da booh ko yeini i dawa nadooh u snem 1995 wei yeini da pynkynmoo hadien kawi pa kawi ka sorkar tangwa khlem mih soh.
Da ong u leh wa ka Barato emkaam jhan ko ya kani ka Outpost toh neidaw wa joor ki kaam pyrchah aiñ wei wa ka Police Station man ko kawa jngai.
U Aiborlang da ong u leh wa neiliang u montri da pyntip u wa i booh ya ka Police Outpost ha kani ka thaw da man i iwa lai chakhmat.
Neiliang u HT Wells uwa man leh uwa yahkhmat ya ka LWO da ong u wa kini ki chnong jan bha ki wa wa ka Block–I, wei ha ki por wa dadep ki paidbah ka thaaiñ da chem chitom bha ki nei chah pyndik ha ki bru kieñ suloi ka Karbi National Volunteers (KNV) wei iwa sñiawsih toh wa kini ki bru ha ki snem wa da lai da rahbor ki ya u khynnah wa dang 15 snem i rta wei da tynyap ya oo wei hadooh katni ka sorkar ym leh ko iwon iwon wow pynbiang ya ki bru wow sonteri ya kini ki chnong.
Discussion about this post